Արտերկրի թուրք քվեարկողներն իշխող կուսակցությունից հետո նախընտրել են քրդական կուսակցությանը

Հրապարակվել են Թուրքիայի խորհրդարանական ընտրություններին արտերկրում մասնակցած թուրքերի քվեները, որոնց համաձայն՝ քրդական Հանրապետական ժողովրդական կուսակցությունն ամենաշատ ձայներ ստացած երկրորդ քաղաքական ուժն է իշխող «Արդարություն և զարգացում» կուսակցությունից (ԱԶԿ) հետո: Ինչպես հաղորդում է «Արմենպրես»-ը՝ վկայակոչելով թուրքական «Հուրիեթ» պարբերականը, Ահմեդ Դավութօղլուի կուսակցությունը տանուլ է տվել այնպիսի երկրներում, ինչպիսիք են Ռուսաստանը, Միացյալ Նահանգները, Չինաստանը, Իտալիան, Միացյալ Թագավորությունը և այլն:

Հետաքրքիր է, որ Միացյալ Նահանգներում ԱԶԿ-ն անգամ երրորդ տեղն է գրավել ստացած ձայների քանակով՝ զիջելով քեմալական Հանրապետական ժողովրդական կուսակցությանն (ՀԺԿ) ու քրդական Ժողովուրդների դեմոկրտական կուսակցությանը (ԺԴԿ):

Արտերկրից եկած ձայների մեծ մասը՝ 49,36 տոկոսը, ստացել է ԱԶԿ-ն, երկրորդ տեղում ԺԴԿ-ն է՝ 21,04 տոկոսով, իսկ երրորդը ՀԺԿ-ն՝ 16,96 տոկոսով:

Կուսակցություններից ամենաշատն ԱԶԿ-ն ձայներ է ստացել Ալժիրում, Ֆրանսիայում, Բելգիայում, Նիդերլանդներում, Գերմանիայում, Դանիայում, Ավստրիայում, Բոսնիա և Հերցեգովինայում, Ռումինիայում, Իրանում, Հորդանանում, Սաուդյան Արաբիայում, Թուրքմենստանում, Ուզբեկստանում, Ղրղստանում, Ավստրալիայում և Նորվեգիայում:

ՀԺԿ-ն հաղթել է Ռուսաստանում, Չինաստանում, Հարավային Աֆրիկայում, Իսպանիայում, ԱՄՆ-ում, Իռլանդիայում, Բուլղարիայում, Իսրայելում, Քուվեյթում, Քաթարում, Միացյալ Արաբական Էմիրություններում և Հունգարիայում:

ԺԴԿ-ն հաղթել է Կանադայում, Լեհաստանում, Իտալիայում, Ուկրաինայում, Ֆինլանդիայում, Ղազախստանում, Ճապոնիայում, Հունաստանում, Շվեդիայում, Միացյալ Թագավորությունում:

«Ազգայնական շարժում» կուսակցությունը ստացել է ձայների մեծամասնությունը միայն Ալբանիայում: