Նախընտրական տեխնոլոգիաներով աչքի են ընկնում միայն ՀՀԿ-ն, ԲՀԿ-ն և «Դաշնակցություն»–ը. սոցիոլոգ

«Հիմա ուզում եմ մի քիչ պարզութուն մտցնենք՝ Հանրապետական կուսակցությունը, ԲՀԿ-ն հավակնում են ձայների մեծամասնությանը, «Ժառանգություն»-ը պատրաստ է կառավարություն ձևավորել, «Դաշնակցություն»–ը երազում է հիսուն տոկոս ձայն հավաքել, ՀԱԿ-ը կարծում է, եթե արդար ընտրություններ անցկացվեն, ապա իրենք պետք է մեծամասնության հասնեն, ՕԵԿ-ը մի քիչ համեստ է՝ հավակնում է տաս տոկոսի, կոմունիստները, որ լավագույն դեպքում կարող են երկու տոկոս հավաքել, նշում են տասնութ տոկոս»,-ասաց սոցիոլոգ, «Սոցիոմետր» անկախ սոցիոլոգիական ՍՊԸ-ի տնօրեն Ահարոն Ադիբեկյանը, և հավելեց, որ նման ամպագոռգոռ հայտարարություններով հանդես եկող քաղաքական գործիչներին ոչ մեկ չի քննադատում, մինչդեռ սոցիոլոգիական հարցումներ իրականացնող կենտրոններին կասկածում են կաշառված և կեղծ տվյալներ հրապարակելու մեջ։

«Մենք պետք է միասնաբար այդ երկար լեզուները կտրենք»,- կոչ արեց Ահարոն Ադիբեկյանը,և ավելացրեց, որ քաղաքական գործիչների նման հայտարարությունները կրում են կեղծ բնույթ։

««Եթե մենք չհայտարարենք, որ հաղթող ենք, ապա ո՞վ կքվեարկի մեր օգտին», այս կերպ են բացատրում իրենց նշած տոկոսների քանակը քաղաքական գործիչները: Բայց արդյո՞ք ընտրողներն այնքան հիմար են, որ չեն հասկանում՝ բնության մեջ չեն կարող լինել միանգամից հինգ հաղթողներ»,-ասաց Ադիբեկյանը։

Ադիբեկյանն անդրադարձավ նաև Հայաստանում ձևավորված համընդհանուր քաղաքական մշակույթին և նշեց, որ բոլորն իրազեկ են և տեղյակ են ինչու կամ ում են ընտրելու։ Իսկ ինչ վերաբերում է նախընտրական տեխնոլոգիաներին, որոնցից են օրինակ բուկլետները, Ահարոն Ադիբեկյանը նշեց, որ բոլոր կուսակցությունները չեն կարող ունենալ տեխնոլոգիաներ: Դրանք մեծ աշխատանք, հնարարավորություններ, ծրագրեր և մասնագետ-տեխնոլոգներ են պահանջում, ինչը յուրաքանչյուր կուսակցություն չի կարող իրեն թույլ տալ։ Նախընտրական տեխնոլոգիաներով աչքի են ընկնում միայն ՀՀԿ-ն, ԲՀԿ-ն և «Դաշնակցություն»–ը, որոնք ունեն միջոցներ իրենց ծրագրերը ընտրողներին ներկայացնելու և քաղաքական դաշտում իրենց նպատակներին հասնելու համար։

Հաշվի առնելով «Էություն» հոգեբանական կենտրոնի կողմից անցկացված հարցումների մոնիթորինգը Ահարոն Ադիբեկյանն ասաց, որ իրավունք ունի մամուլին հայտնել միայն որոշակի տվյալներ՝ չվատաբանելով և չգովաբանելով ոչ մեկին։ Ըստ վերջին տվյալների՝ իրատես են Հանրապետական, «Օրինաց երկիր», «Դաշնակցություն» և ԲՀԿ կուսակցությունները։ Մյուս կուսակցությունները աշխատում են աչքաչափով։