Թուրքիայի մեջլիսը 97 կին պատգամավոր կունենա

Թուրքիայի 25-րդ խորհրդարանական ընտրությունների արդյունքներով մեջլիսում 550 պատգամավորից 97-ը կանայք են:

Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:

Ընտրություններում նախընտրական 10- տոկոսանոց շեմը հաղթահարած քրդական Ժողովուրդների դեմոկրատական կուսակցության (ԺԴԿ) կողմից ընտրված պատգամավորների 40 տոկոսը կանայք են: Թուրքիայի Ազգային մեծ ժողովում պատգամավորական 80 մանդատ ստացած քրդական կուսակցությունը մեջլիսում կունենա 32 կին պատգամավոր:

Թուրքիայի իշխող «Արդարություն և զարգացում» կուսակցության (ԱԶԿ) կողմից ընտրվել է 41 կին պատգամավոր, քեմալական Հանրապետական ժողովրդական կուսակցությունից (ՀԺԿ)' 20, իսկ «Ազգայնական շարժում» կուսակցությունից (ԱԺԿ)' 4: Կին պատգամավորների թվում է նաև ՀԺԿ կողմից առաջադրված հայուհի Սելինա Դողանը:

Թուրքիայի խորհդարանական ընտրությունների քվեատուփերի 99,98 տոկոսի արդյունքները հրապարակված են: Դրանց համաձայն իշխող «Արդարություն և զարգացում» կուսակցությունը ստացել է ձայների 40,85 տոկոսը (258 պատգամավոր), Հանրապետական ժողովրդական կուսակցություն' 24,96 տոկոսը (132 պատգամավոր), «Ազգայնական շարժում» կուսակցությունը' 16,28 տոկոսը (80 պատգամավոր) և քրդական Ժողովուրդների դեմոկրատական կուսակցություն' 13,11 < /i>տոկոսը (80 պատգամավոր):

Ընտրություններին երկրի ներսում մասնակցել է ընտրելու հնարավորություն ունեցող քաղաքացիների 86,62 տոկոսը: Անվավեր է ճանաչվել ավելի քան մեկ միլիոն քվեաթերթիկ: