ԲՀԿ-ի դեմ կազմակերպված ցանկացած հակաքարոզչությանը տրվելու է ամենախիստ հակահարվածը. Վահե Հովհաննիսյան

Երեկ՝ Հայկական երկրորդ հեռուստաալիքով հեռարձակվող «Խոսքի իրավունք» հաղորդման հյուրն էր «Հեռանկար ծրագրեր»-ի տնօրեն, քաղաքագետ Վահե Հովհաննիսյանը, որը զբաղեցնում է ԲՀԿ համամասնական ցուցակի 7-րդ համարը: Վերջինս, անդրադառնալով արդեն իսկ մեկնարկած քարոզարշավին, ասաց. «Քարոզարշավը չի կարող էապես տարբերվել այն մթնոլորտից, որը առկա էր նախորդ հինգ տարիներում: Մենք չենք կարող ասել, որ երկրում ամեն ինչ կարգին է, մարդկանց տրամադրությունները շատ բարձր են և խանդավառությամբ մտնում են քարոզարշավի փուլ՝ ո՛չ: Մենք քարոզարշավի փուլ մտնում ենք չլուծված խնդիրների բեռով, քարոզարշավի փուլ մտնում ենք բազմաթիվ հարցերով, որոնց պատասխանները մինչ այսօր չի տրվել: Թեև երեք օրն իրականում քիչ ժամանակ է, ես կարծում եմ քարոզարշավի ընթացքում կլինեն լուրջ բանավեճեր, կլինեն քննարկումներ, կլինեն տեսակետների բախումներ և կոնկրետ այն ուժը, որը ներկայացնում եմ ես՝ քարոզարշավի է գնում շատ հստակ մի քանի սկզբունքներով: Սկզբունք առաջին՝ մենք հանրությանը ներկայացնում ենք լուրջ ծրագիր, տնտեսական, քաղաքական, հասարակական բարեփոխումների ծրագիր, որի վրա աշխատել են մեր երկրի լավագույն մասնագետները, ծրագիր, որը քննարկվել է արտերկրի լավագույն մասնագետների հետ: Երկրորդ՝ ծրագիրը պետք է ներկայացվի քաղաքական թիմի միջոցով, այն օրակարգը, որ պետք է ապահովվեն քարոզարշավի ընթացքում այն այս կամ այն ուժի համար, դա անում է քաղաքական թիմը: «Բարգավաճ Հայաստան»–ը՝ Ծառուկյանի գլխավորությամբ հավաքել է լուրջ թիմ, որտեղ կուսակցական պատկանելիությունը ամենակարևորը չէ, եթե նայենք ԲՀԿ-ի ցուցակին, կան անկուսակցականներ բավական մեծ թվով և այլ կուսակցությունների ներկայացուցիչներ: Եվ երրորդ սկզբունքը՝ մենք շատ համառորեն, առանց հոգնելու, առանց սրտնեղելու մեր քարոզչական խմբերով գնալու ենք մինչև ամենափոքր գյուղը: Ծրագիրը ներկայացվելու է, ծրագիրը քննարվելու է բնակչության հետ, օգտագործվելու են ողջ հեռուստաեթերի, լրատվական դաշտի հնարավորությունները. ծրագիրը ներկայացնել, համոզել և ակնկալել ձայներ՝ մեր ծրագիրը իրականացնելու համար»:

Նրա խոսքերով՝ մի բան չի արվելու. որևէ ուժի հանդեպ կոռեկտության սահմանները երբևէ չեն անցնելու, դա շատ հստակ քաղաքական որոշում է, շատ խիստ հրահանգ է և նրանց կողմից որևէ ուժի նկատմամբ վիրավորանքներ, մեղադրանքներ չեն լինելու, բայց դա չի նշանակում, որ, եթե խախտվի քաղաքական կոռեկտության սկզբունքը, իրենք հակահարված չենք տալու: «Եթե մենք նկատենք, որ «Բարգավաճ»–ի հանդեպ գնում է որևէ կազմակերպված հակաքարոզչություն՝ լինելու է ամենախիստ հակահարվածը: Սրանք այն սկզբունքներն են, որով մենք մտնում ենք քարոզչության փուլ և հուսով եմ, որ այդ ընթացքում կկարողանանք ներկայացնել մեր տեսակետները և հասանելի դարձնել բոլոր մարդկանց», - նշեց Վահե Հովհաննիսյանը: