«Հրապարակ». Սուրեն Խաչատրյանը հրահանգել է թույլ չտալ մարդ բերել՝ ԲՀԿ ղեկավարի այցելության ժամանակ

«Բարգավաճ Հայաստան» կուսակցության նախընտրական հանդիպումների շրջանակներում ապրիլի 26-27-ը Սյունիքի մարզում նախատեսված հանդիպումներն ըստ ամենայնի ուշագրավ են լինելու: Թերթի տեղեկություններով, Սյունյաց մարզպետ Սուրեն Խաչատրյանն օրերս խորհրդակցություն է կազմակերպել, որին հրավիրել է բոլոր տարածքային ղեկավարներին և խիստ հրահանգել նրանց, որ ԲՀԿ ղեկավարի այցելության ժամանակ թույլ չտան մարդիկ բերել: Մարզպետն ասել է նաև, թե՝ ոնց ուզում եք, այդ մասին հասկացրեք ԲՀԿ Սյունիքի մարզային կառույցի ղեկավարներին և կանխեք:

«Վայն եկել է ձեզ տարել, եթե իմացա, որ հրամանս չեք կատարել»,-մոտավորապես այսպես է դիմել Խաչատրյանը ներկաներին: Սակայն ԲՀԿ մարզային կառույցների ղեկավարները լուրն այնուամենայնիվ հասցրել են ղեկավարությանը: Եվ հիմա, ըստ լուրերի, Ծառուկյանը որոշել է հարևան մարզի՝ Վայոց ձորի ընտրողներին հասցնել Սյունիք: Թերթը նշում է, որ Վայոց ձորի մարզպետը ԲՀԿ-ական Սերգեյ Բագրատյանն է, ով նաև մարզի կուսակցական կառույցի ղեկավարն է: Ըստ որոշ լուրերի, մոտ 15 ավտոբուս է նախատեսված Վայոց ձորից մարդկանց տեղափոխելու համար: Ի դեպ, թերթին չի հաջողվել պարզաբանում լսել մարզպետ Խաչատրյանից, վերջինս չի ցանկացել լսել նույնիսկ հարցը: Փոխարենը թերթը զրուցել է Սյունիքի ԲՀԿ մարզային խորհրդի նախագահ Կամո Հարությունյանի հետ, ով ասել է. «Մարզպետը չի կարող մեր հավաքներին խոչընդոտել»: Իսկ այնուամենայնիվ նման մտադրություններ մարզպետն ունի՞, հետաքրքրվել է թերթը. «Հա, նման խոսակցություններ քաղաքում պտտվում են, բայց ես հաստատ համոզված եմ, որ մարզպետը ոչ կուզենա ըտենց բանի գնա, համ էլ չի կարա»: Իսկ ԲՀԿ մամլո խոսնակ Խաչիկ Գալստյանն ասել է. «Երբ լինի հանդիպումը, ինքներդ կլսեք ու կտեսնեք, թե որքան մարդ կլինի: Անձամբ մասնակիցներին կհարցնեք, թե ով որտեղից է եկել մասնակցելու հանրահավաքին»: