Facebook-ը պոտենցիալ ընտրողների վրա ազդեցություն գործելու միջոց

Այսօր սոցիոլոգ Լաուրա Բաղդասարյանը լրագրողների հետ հանդիպման ժամանակ խոսեց Facebook սոցիալական կայքում իրականացված հետազոտությունների մասին։ Նա նշեց, որ Facebook սոցիալական կայքում գրանցված են մոտավորապես երկու հարյուր իննսուն հազար ութ հարյուր քառասուն հայաստանաբնակներ՝ ինչպես անհատներ, այնպես էլ քաղաքական, հասարակական գործիչներ, անգամ քարոզչական նպատակներ հետապնդող կուսակցություններ։ Facebook-ում ներկայացված են նաև բազմազան ԶԼՄ–ներ, տարբեր ՀԿ–ներ։

«Սա մի հանգամանք է, որը մեզ դրդեց մտածել Facebook-ում գրանցված և ակտիվ գործունեություն ծավալող կուսակցությունների ՝ՀՀԿ–ի, ԲՀԿ–ի, ՀԱԿ–ի, «Ժառանգություն» կուսակցության և ՀՅԴ–ի նպատակների մասին. նպատակը իհարկե մեկն է՝ մարդաշատ սոցիալական ցանցի միջոցով գովազդային արշավ սկսել և ազդեցություն գործել պոտենցիալ ընտրողների վրա»,– հայտարարեց Լաուրա Բաղդասարյանը։

Նա նաև նշեց մի շատ հետաքրքիր փաստ, որ գրանցված կուսակցություններից շատերը չունեն գովազդի կարիք, քանի որ նրանց քարոզարշավները ներկայացվում են ամենաազդեցիկ լրատվամիջոցներից մեկով՝ հեռուստատեսությամբ, ինչպես օրինակ «Հանրապետական» կուսակցությունը լուսաբանվում է մի քանի հեռուստատեսություններով, «Կենտրոն» հեռուստատեսությունը ներկայացնում է ԲՀԿ–ին, «Երկիր մեդիա»–ն ՝«Դաշնակցություն» կուսակցությանը։ «Մենք գալիս ենք այն համոզմանը, որ սոցիալական կայքերն այսօր դարձել են ազդեցիկ գոտի, ինչպես մեծ թիվ կազմող, դեռ քաղաքական կողմնորոշում չունեցող պատանիների և երիտասարդների վրա ազդեցություն թողնելու, այնպես էլ այլ գործունեություններ ծավալող անհատների անվճար առաջխաղացման համար»,– ասաց բանախոսը: