Մարիա Շարապովան կարող է տուգանվել իր ճիչերի համար

Կանանց թենիսի ասոցիացիան քննարկում է թենիսիստուհիների բողոքները. վերջիններս դժգոհում են Մարիա Շարապովայի և Վիկտորիա Ազարենկոյի «աղմկոտ» պահվածքից» կորտում: WTA-ի հասարակայնության հետ կապերի բաժնի փոխնախագահ Էնդրյու Ուոկերը հայտարարել է, որ տնօրենների խորհուրդը պատրաստ է միջոցներ ձեռնարկել, հաղորդում է vesti.ru-ն:

Սկզբում թենիսիստուհիների բացականչություններին հումորով էին վերաբերվում, սակայն այդ հարցն աստիճանաբար խնդրի վերածվեց, երբ նախորդ ամռանը Շարապովայի և Ազարենկոյի հակառակորդուհիները սկսեցին բողոքել:

Օրինակ, Կառոլին Վոզնյացկին հայտարարել է, որ Մաշայի և Վիկտորիայի ճիչերը խանգարում էին նրան կենտորոնանալ խաղի վրա: «Մարզումների ժամանակ նրանք լուռ են, իսկ խաղի ընթացքում սկսում են բղավել, - ասել է Վոզնյացկին: «Ես այդպես 4 տարեկան հասակից եմ բղավում և ոչինչ չեմ կարող փոխել, - հայտարարել է Շարապովան:

Ինչպես փաստում են իրենք' մարզուհիները, այդ ճիչերն օգնում են իրենց ազատվել սթրեսից, կարգավորել շնչառությունը և կենտրոնանալ հարվածի վրա: Իսկ նրանց հակառակորդուհիներին այդ ձայները խանգարում են վերահսկել խաղի ընթացքը, քանի որ նրանք չեն լսում ետ մղվող գնդակի ձայնը:

Թենիսի կորտում բղավում են նաև տղամարդիկ, բայց կանանց դեպքում այդ բացականչություններն ավելի տպավորիչ են: Ինչպես կարծում է WTA-ի ղեկավար Սթեյսի Ալաստերը, այժմ արդեն ուշ է փոխել աստղերին, սակայն կարելի է ազդել երիտասարդ սերնդի վրա: WTA-ի կողմից քննադատության է ենթարկվել Նիկ Բոլետյերիի ակադեմիան, որն ավարտել է Շարապովան, ով միակը չէ ճիչ արձակողների շարքում:

Ինքը' Բոլիտյերին ասում է, որ հատուկ ոչ ոքի չի սովորեցրել ճչալ: Թենիսի կանոնների համաձայն' մարզիկները կարող են միավորներ կորցնել, եթե կանխամտածված գործողություններ անեն' փորձելով խանգարել հակառակորդին: Եթե Շարապովայի ձայները ևս այդպիսիք ճանաչվեն, նա ստիպված կլինի լռել, բայց դժվար կլինի մեծ թենիսն առանց նրա ճիչերի պատկերացնել: