«Ակոս»-ում աշխատելու համար ադրբեջանցի լրագրողը լինչի է ենթարկվել Ադրբեջանում և Թուրքիայում

Ստամբուլի երկլեզու' թուրքերեն եւ հայերեն հրապարակվող «Ակոս» թերթի ծագումով ադրբեջանցի լրագրող Արզու Գեյբուլլաեւան հայտարարել է, որ հիշյալ թերթում աշխատելու համար լինչի դատաստանի է ենթարկվել Թուրքիայում եւ իր հայրենիքում' Ադրբեջանում:

Ինչպես հաղորդում է «Արմենպրես»-ը, «Ակոս»-ում հրապարակված հարցազրույցում Գեյբուլլաեւան հայտնել է, որ նաեւ հայերենով հրապարակվող թերթում աշխատելու համար Ադրբեջանի եւ Թուրքիայի որոշ կայքերում իր հասցեին սիստեմատիկորեն սպառնալիքներ են հնչեցվել, ինչի պատճառով որոշ ժամանակով ստիպված է եղել հեռանալ Ստամբուլից: Նա նշել է, որ այդ սպառնալիքների պատճառով վախեցել այցելել հայրենի Ադրբեջան, քանի որ այնտեղ մեծ թվով քաղաքական բանտարկյալներ կան:

Գեյբուլլաեւան թերթին հարցազրույց է տվել երկար ժամանակով Թուրքիայից բացակայելուց հետո կրկին «Ակոս» աշխատանքի վերադառնալու առնչությամբ:

Այդ սպառնալիքների շրջանը իմ կյանքի ամենածանր ժամանակաշրջանն էր: Առաջին անգամ մահվան սպառնալիք ստացա: Սեփական երկրում' հայրենիքում կառավարության աջակցությամբ հայրենիքի դավաճան հայտարարվեցի: Այնպիսի ատելության արժանացա, որ երկար ժամանակ չէի կարողանում ազատվել այդ շոկից: Ինձ ցնցել էր այն, որ կարողացել էին իմ համաքաղաքացներին այդքան հեշտ թյուրիմացության մեջ գցել: Ամեն ինչ սկսվեց, երբ Ադրբեջանում հրապարակվող շարքային տեղեկատվական կայքից Ադրբեջանում կանանց իրավունքների խախտումների վերաբերյալ հոդված գրելու պատվեր ստացա եւ ընդունեցի: Դրանից հետո իմ հասցեին սպառնալիքների տարափ սկսվեց ավելի շատ ոչ թե հոդվածի, այլ նրա հետ կապված, որ ես աշխատում եմ «Ակոս»-ում:

Ամենասարսափելին այն էր, որ պատրաստածս հոդվածն ընթերցողներին մատուցվեց ոչ այն բովանդակությամբ, ինչպես ես ներկայացրել էի: Նրանք անցանկալի փոփոխություններ էին մտցրել իմ հոդվածում, որից հետո ադրբեջանական կայքերում, սոցցանցերում եւ ԶԼՄ-ներում իսկական լինչի դատաստան էր սկսվել իմ դեմ: Իմ, մորս, հանգուցյալ հայրիկիս հասցեին վիրավորանքներ եւ հայհոյանքներ տեղացին: Հետո մահվան սպառնալիք ստացա: Այդ սպառնալիքով հետաքրքրվեցին «Ակոս»-ի փաստաբանները, ինձ իրենց աջակցությունը հայտնեցին միջազգային PEN, Գրաքննության ինդեքս, Լրագրողներն առանց սահմանների կազմակերպությունները, Թուրքիայի լրագրողների միությունը, թուրքական Evrensel, Bianet, Radikal, Taraf թերթերը եւ բազմաթիվ հասարակական կազմակերպություններ, որոնց բոլորին երախտագիտություն եմ հայտնում», -ասել է Գեյբուլլաեւան:

Ադրբեջանցի լրագրողը հայտնել է, որ Վացլավ Հավելի լրագրողական թոշակով ժամանակավորապես Պրահայում աշխատել է «Ազատություն» ռադիոկայանում: «Ինձ ասում էին, որ ես պետք է այդ աշխատանքը շարունակեմ «Ազատություն» ռ/կ-ի Բաքվի գրասենյակում, սակայն, հասկանալի էր, որ ես այնտեղ մեկնել չէի կարող»,- պատմել է նա:

«Ես մասնակցել եմ Հայաստանի եւ Ադրբեջանի միջեւ համատեղ նախագծերին, անգամ գլխավորել եմ այդ ոլորտում աշխատող քաղաքացիական հասարակական կազմակերպություն: Այդ ինչպե՞ս ստացվեց, որ այդ նախագծին մասնակցող կազմակերպություններն ու մարդիկ միանգամից հայրենիքի դավաճան հայտարարվեցին Ադրբեջանում: Եթե Ադրբեջանի կառավարությունը խաղաղության կողմնակից է, ապա այդ դեպքում ինչո՞ ւէ սեփական քաղաքացիների դեմ նման կեղտոտ արշավ սկսել», -զարմանք է հայտնել «Ակոս»-ի ադրբեջանցի լրագրողը: