Թուրքիայի մեջլիսում երդման արարողությունը կտևի 11-12 ժամ
Թուրքիա
Թուրքիայի 25-րդ գումարման նստաշրջանի նորընտիր մեջլիսում հունիսի 23-ին տեղի կունենա պատգամավորների երդման արարողությունը: Արարողությանը հետևելու է նաև երկրի նախագահ Ռեջեփ Թայիփ Էրդողանը:
Ինչպես հաղորդում է «Արմենպրես»-ը, այս մասին տեղեկացնում է թուրքական «Հաբերլեր» լրատվականը:
Նիստի ամենասկզբում մեջլիսի գործող խոսնակն իր պաշտոնը կտա Թուրքիայի Ազգային մեծ ժողովի ամենատարեց պատգամավորին' քեմալական Հանրապետական ժողովրդական կուսակցության նախկին ղեկավար, նույն կուսակցությունից ընտրված պատգամավոր Դենիզ Բայկալին: Այնուհետև պատգամավորներն այբբենական կարգով կկանչվեն ամբիոնի մոտ: 550 պատգամավորից յուրաքանչյուրի երդումը կտևի մոտ 1 րոպե, հետևաբար նախատեսվում է, որ այդ արարողությունը կշարունակվի 11-12 ժամ:
Երդման արարողության ավարտից հետո մեջլիսի պատգամավորները կունենան 5 օր խոսնակի պաշտոնում իրենց թեկնածությունն առաջադրելու համար: Մեջլիսի նախագահի առաջին ընտրությունը տեղի կունենա հունիսի 29-ին: Խոսնակին ընտրելուց հետո երկրի նախագահը պատգամավորներից մեկին կհանձնարարի կազմել կառավարություն, ինչից հետո էլ կսկսվեն կոալիցիա կազմելու շուրջ բանակցությունները: Կառավարության կազմման համար կտրվի 45 օր:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
