Մարդիկ հացով հաց են ուտում. Ռուբեն Թովմասյան

«Մեր կարգախոսներից մեկը հետևյալն է՝ իշխանությունն ու երկրի հարստությունը վերադարձնենք ժողովրդին. կոմունիստների հաղթանակը՝ դա ժողովրդի հաղթանակն է», - երեկ այս մասին ասաց Հայկական երկրորդ հեռուստաալիքով հեռարձակվող «Խոսքի իրավունք» հաղորդման հյուր, ՀԿԿ կենտկոմի առաջին քարտուղար Ռուբեն Թովմասյանը: Թովմասյանը նշեց, որ որպեսզի ժողովուրդն աշխատատեղեր ունենա, դադարեցվի արտագաղթը, անհապաղ անհրաժեշտ է ազգայնացնել երկրի հարստությունը:

«Ես ազգայնացման մասին ասեցի, դրա հետ միասին մենք պետք է խորանանք նաև այն բոլորի մեջ, ինչը տեղի ունեցավ 90-ականներին... դրամափոխանակությունը, երբ ժողովուրդը 250 հազար ռուբլի տվեց, 50 հազար դրամ ստացավ: Դե պատկերացրեք սովետական 250 հազարը և այսօրվա 50 հազարը», - նշեց Ռուբեն Թովմասյանը։ ՀԿԿ կենտկոմի առաջին քարտուղարի խոսքերով՝ իրենց 45 շրջկոմներն արդեն ապրիլի 8-ից անցկացնում են հանդիպումներ ազգաբնակչության հետ: «Մարդիկ հացով հաց են ուտում, ինչի՞ պետք է այդպես լիներ: Փիլիսոփաներն ասում են, եթե մերկանում ենք՝ բոլորս իրար նման ենք, հագուստով ու ունեցվածքով ենք տարբերվում», - զարմացավ նա։

Անդրադառնալով զանգվածային հավաքներին՝ Ռուբեն Թովմասյանը շեշտեց, որ իրենք «ոտքը պետք է իրենց վերմակի չափով մեկնեն»: Նրա խոսքերով՝ կոմունիստները պատրաստվում են զանգվածային նշել մայիսի 1-ը՝ որպես աշխատավորների տոն: «Ինձ համար շատ ծանր է, որ այսօր մեր երկրում հեղինակազրկված է աշխատավոր մասսան, բանվորը, գյուղացին: Տեսեք գյուղացու վիճակը ինչպիսինն է, իբր թե գազաֆիկացված է, բայց գյուղն անցել է աթարի և դրա պատճառը խայտառակ գներն են, ամբողջ գյուղական ճանապարհները իրականում քանդված են, բայց գյուղի անունը գրված է անգլերեն», - նշեց ՀԿԿ կենտկոմի առաջին քարտուղարը: