Համագործակցության նոր փուլ

Ապրիլի 13-ին Արտակարգ իրավիճակների նախարար Արմեն Երիցյանն ընդունեց «Հարավկովկասյան երկաթուղի» ՓԲԸ պատվիրակությանը՝ գլխավոր տնօրեն Վիկտոր Ռեբեցի գլխավորությամբ։

Ողջունելով հյուրերին և շնորհավորելով պարոն Ռեբեցին գլխավոր տնօրենի պաշտոնում նշանակվելու կապակցությամբ, Արմեն Երիցյանը համառոտ ներկայացրեց նախարարության կառուցվածքը, նրանում ներգրավված ծառայություններն ու գործակալությունները և դրանց գործառույթները։

-Ինչպես գիտեք, անցյալ տարվա դեկտեմբերին մենք ստորագրել ենք համագործակցության հուշագիր և այժմ ակտիվ աշխատանքներ ենք իրականացնում հուշագրի բոլոր ուղղություններով։ Չեմ կարող չնշել Ձեր ընկերության աշխատակիցների ցուցաբերած աջակցությունն ու դրսևորած պրոֆեսիոնալիզմը' Տավուշի մարզում տեղի ունեցած խոշոր սողանքի հետևանքների վերացման ժամանակ։ Ընդամենը տասն օր առաջ մեր աշխատակիցները Ջաջուռ–Մայիսյան երկաթգծի հատվածներից մեկում պայթեցման միջոցով ձնահյուսի սպառնալիքի վերացման աշխատանքներ են իրականացրել: Համոզված եմ, որ ԱԻ նախարարությունն ու «Հարավկովկասյան երկաթուղին» համատեղ բազմաթիվ քայլեր ունեն անելու և ծրագրեր իրականացնելու երկրում արտակարգ իրավիճակների կանխարգելման, դրանց հետևանքների նվազեցման և երկաթուղու անվտանգ շահագործման բնակավառում, - ավելացրեց նախարար Երիցյանը։

ՀԵԿ գլխավոր տնօրեն Վիկտոր Ռեբեցը, շնորհակալություն հայտնելով նախարարին շնորհավորանքների և ընդունելության համար, նշեց, որ «Հարավկովկասյան երկաթուղին» պատրաստակամ է ամրապնդելու Արտակարգ իրավիճակների նախարարության հետ կապերը և համագործակցության բոլոր ուղղությունները լցնել կոնկրետ բովանդակությամբ։

Հանդիպման ընթացքում քննարկվեցին համագործակցության մի շարք ուղղություններ, այդ թվում՝ տեղեկատվության ակտիվ փոխանակում, կադրերի ուսուցում և վերապատրաստում, ԱԻ նախարարության և ՀԵԿ-ի տեխնիկական հնարավորություններ ու հագեցվածություն։