Ժառանգաբար փոխանցվող արհեստները՝ զարգացման ընդհանուր հարթակ

2012 թ. ապրիլի 10-ին կայացավ «Ժառանգաբար փոխանցվող արհեստները՝ զարգացման ընդհանուր հարթակ. ստեղծագործական արտադրությունների հզորացում Հայաստանում, Ադրբեջանում և Վրաստանում» ծրագրի շնորհանդեսը:

Ծրագիրը ֆինանսավորվում է Եվրոպական միության կողմից՝ Արևելյան գործընկերության մշակութային ծրագրի ներքո, որը ներառում է վեց երկրներ' Հայաստան, Վրաստան, Ադրբեջան, Բելառուս, Մոլդովա, Ուկրաինա: Ծրագրի նպատակն է նպաստել մշակույթի դերի աճին՝ որպես երկրների և Արևելյան գործընկերության կայուն սոցիալական և տնտեսական զարգացման ուղղորդիչ և խթանել մշակույթի ասպարեզում հանրային և մասնավոր դաշտի միջև տարածաշրջանային համագործակցությունը:

«Ժառանգաբար փոխանցվող արհեստները՝ զարգացման ընդհանուր հարթակ» ծրագիրն ուղղված է ստեղծագործական արտադրությունների բնագավառի ինստիտուցիոնալ զարգացմանը, մասնավորապես՝ Հայաստանում, Ադրբեջանում և Վրաստանում ավանդական արհեստների զարգացմանը, սատարում է առողջ գործարար միջավայրի ընդլայնմանը՝ ժառանգական արհեստները տնտեսապես շահութաբեր դաշտի մեջ ներառելու և ԵՄ քաղաքականությանն ինտեգրվելու նպատակով:

Ծրագրի հիմնական բաղադրիչներն են՝ գնահատման աշխատանքներ և քաղաքականության մշակում, այն է՝ ավանդական արհեստների բնագավառի սկզբնական ուսումնասիրում և քարտեզագրում, կարիքների հայտնաբերում, հանձնարարականների մշակում, կարողությունների ստեղծում և արտադրանքի փորձարկում. Եվրոպական մշակութային քաղաքականության և մշակութային վիճակագրության թեմաներով սեմինարների, ավանդական արհեստների ձեռնարկատիրության կառավարման և ձեռներեցության թեմայով նպատակային պարապմունքների կազմակերպում, տեղեկացվածության մակարդակի բարձրացման քարոզարշավի կազմակերպում. «Մշակույթը հանուն տնտեսական զարգացման» միջազգային համաժողովի և այլ գովազդային նյութերի միջոցով հասարակությանը ներկայացնել ավանդական արհեստների՝ որպես տնտեսական զարգացման և աշխատատեղերի ստեղծման աղբյուրի գաղափարը, գործարար կապերի ստեղծում. արվեստագետների, վարպետների և մշակութային կազմակերպությունների գործընկերությունների կայքերի, միասնական տեղեկատվական ցանցի ստեղծում՝ ինտեգրում Եվրոպական ցանցերին:

Ծրագրի առաջատար գործընկերն է Վրաստանի «Istoriali» արվեստի և մշակույթի կենտրոնը: Հայաստանում ծրագիրն իրականացնում է «ԱՐԿԱՆԵԼ» ցուցահանդեսային գործակալությունը: