«Հայկական ժամանակ». Երկուշաբթի օրվա Փաշինյան և Հայրապետյան բանավեճը մնում է ուժի մեջ

«Արմնյուզ» հ/ը տնօրեն Արտակ Ալեքսանյանը երեկ «epress.am»-ին հայտնել է, որ երկուշաբթի օրը իրենց եթերում Նիկոլ Փաշինյան-Ռուբեն Հայրապետյան բանավեճը չի կայանա, քանի դեռ չկա կողմերի փոխհամաձայնությունը:

«Քանի որ Նիկոլ Փաշինյանն ինքն էր ցանկություն հայտնել բանավիճել Ռուբեն Հայրապետյանի և Սամվել Ալեքսանյանի հետ, սակայն, այս պահի դրությամբ, չկա վերջիններիս համաձայնությունը, հետևաբար` երկուշաբթի նման ձևաչափով հաղորդում «Արմնյուզ»-ի եթերում չի լինելու»,- ասել է «Արմնյուզ»-ի տնօրենը:

Թերթը նշում է, որ Արտակ Ալեքսանյանի ներկայացրածը մի փոքր շեղվում է իրականությունից: Սամվել Ալեքսանյանին Նիկոլ Փաշինյանն ինքն է հրավիրել բանավեճի: Սամվել Ալեքսանյանը դեռևս չի պատասխանել այդ հրավերին: Ինչ վերաբերում Է Ռուբեն Հայրապետյանին, վերջինս ինքն է ապրիլի 12-ի ասուլիսում պատրաստակամություն հայտնել բանավիճել Հայ ազգային կոնգրեսի առաջին տասնյակում ընդգրկված գործիչների հետ: Սրան ի պատասխան, Փաշինյանն ընդունել է այդ հրավերը, ինչը նշանակում է՝ առկա է կողմերի համաձայնություն: Այնպես որ, երկուշաբթի օրվա ուղիղ եթերը մնում է ուժի մեջ: