«Հայկական ժամանակ». Տոնոյանի բաժնի պետի պաշտոնում նշանակումը առաջացնում է մարդու իրավունքների խախտման վտանգներ

ՀՀ ոստիկանապետ Վլադիմիր Գասպարյանի երեկ ստորագրած հրամանով Սամվել Տոնոյանը նշանակվել է ոստիկանության Չարենցավանի բաժնի պետ: Ուղիղ երկու տարի առաջ նա էր ոստիկանության Չարենցավանի բաժնի պետի օպերատիվ գծով տեղակալը, երբ այդ բաժնում խոշտանգումների զոհ դարձավ Չարենցավանի բնակիչ, 24-ամյա Վահան Խալաֆյանը: Երիտասարդի հարազատները բազմիցս հայտարարել են, որ իրենց որդու հետ կատարվածի հիմնական մեղավորներից մեկը հենց Տոնոյանն է, բայց նա Խալաֆյանի մահվան հանգամանքները քննող քրեական գործով անցել է որպես վկա և ոչ միայն պատասխանատվության չի ենթարկվել, այլ նաև պաշտոնի բարձրացում է ստացել՝ նշանակվելով ոստիկանության Կոտայքի մարզային վարչության պետի տեղակալ և մինչև երեկ զբաղեցնում էր այդ պաշտոնը: Վահան Խալաֆյանի հորեղբայրը՝ Համիկ Խալաֆյանը, թերթի թղթակցի հետ զրույցում երեկ ասել է, որ Տոնոյանի նշանակման մասին իրենք իմացել են գերեզմանոցում՝ Վահան Խալաֆյանի շիրիմի մոտ:

«Ի՞նչ են ուզում ապացուցել, ի՞նչ են ուզում ասել: Երեխայի հետ տեղի ունեցածի համար հիմնական մեղավորներից և դերակատարներից մեկը հենց նա էր, և նա պետք է նստած լիներ չորս մեղադրյալների կողքին, իսկ այսօր՝ երեխայի մահվան տարելիցի օրը նրան նշանակում են Չարենցավանի ոստիկանապետ»,- ասել է Վահան Խալաֆյանի հորեղբայրը: Նա նաև ասել է, որ, իր կարծիքով, այս նշանակումն ընտրությունների հետ է կապված:

«Նշանակել են, որ իր մեթոդներով կարողանա իշխանությունների համար ձայն ապահովել»,- ասել է Համիկ Խալաֆյանը:

Հելսինկյան քաղաքացիական ասամբլեայի Վանաձորի գրասենյակը երեկ հանդես է եկել հայտարարությամբ՝ իր տարակուսանքը հայտնելով այս նշանակման կապակցությամբ:

«Ոստիկանապետը բաժնի պետի պաշտոնում նշանակում է մի անձի, որի ենթակայությամբ աշխատած ոստիկանները մեղադրվել են քաղաքացիների նկատմամբ բռնություններ և խոշտանգումներ կիրառելու հիմքով, որոնցից մեկը մահացել է: Գտնում ենք, որ նման կադրային նշանակումը առաջացնում է ոստիկանության Չարենցավանի բաժնի կողմից մարդու իրավունքների խախտման վտանգներ, որի ողջ պատասխանատվությունը կրում է ոչ միայն անձամբ Ս. Տոնոյանը, այլև ՀՀ ոստիկանապետ Վ.Գասպարյանը»,- հայտարարել է իրավապաշտպան կազմակերպությունը: