«Ժողովուրդ». Գյումրու քաղաքապետը պնդում է, որ փեսայի սպանության պատճառը քաղաքական է

Թեև երեկ լուրեր շրջանառվեցին, որ ապրիլի 12-ին Գյումրու քաղաքապետ, ՀՀԿ Շիրակի կառույցի ղեկավար Վարդան Ղուկասյանի փեսա Կարեն Եսայանին սպանել են խանդի հողի վրա, այնուամենայնիվ, աներն այդ կարծիքին չէ:

«Խանդի խնդիր չկա, դա սուտ է, որովհետև խանդի խնդիր առաջանում է այն ժամանակ, երբ իրար ճանաչում են կամ գոնե մի անգամ բարև են տվել: Ի՞նչ խանդ, խանդը սարքովի է: Բոլոր ձերբակալվածները Գյումրիի ԲՀԿ-ի շտաբի կարկառուն անդամներն են», - երեկ հայտարարել է Վարդան Ղուկասյանը' ավելացնելով, «Այդ երիտասարդը' իր ընտանիքով, շրջապատով, ԲՀԿ-ական են: Պատճառը քաղաքական է, որ մեզ հանեն այս ընտրապայքարից, ոնց որ նախորդ անգամ մեզ խփեցին ընտրությունների ժամանակ: Սա ել նույն սցենարի նման մի բան է»:

Իսկ ԲՀԿ Շիրակի մարզային կառույցի նախագահ, ԱԺ պատգամավոր Մարտուն Գրիգորյանը «Ժողովուրդ»-ի հետ զրույցում ասել է.

«Այդ պատմությունը բացարձակ կապ չունի ԲՀԿ-ի հետ: Իրենք ոչ կուսակցական են, ոչ էլ նրանց ընտանիքի անդամներն են կուսակցական: Ինձ համար անհասկանալի է քաղաքապետի պնդումը: Մենք մեր քարոզարշավով ենք զբաղված: Դժբախտությունը կապել քաղաքականության հետ, չի կարելի: Ուղղակի էդ մարդը հենց տրամադրություն չի ունենում, մեկին մեղադրում է»:

Ի դեպ, ձերբակալված Հարություն Սարգսյանի մայրը' Անահիտ Նիկոլյանը, թերթի հետ զրույցում պնդեց, որ իր որդուն ձերբակալել են ԲՀԿ շտաբ մտնելու համար, նա կապ չունի սպանության հետ: