ԻՊ-ն Պալմիրայում երկու հազար տարվա հնության արձան է ոչնչացրել

«Իսլամական պետությունը» ոչնչացրել է պատմական Թադմուր (Պալմիրա) քաղաքի թանգարանի բակում տեղակայված հսկայական «Ալ Լաթ առյուծի» արձանը: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այս մասին տեղեկացրել է Հնությունների և թանգարանների վարչության պետ Մաամուն Աբդ ալ Քարիմը: Նրա խոսքով՝ ԻՊ-ի ահաբեկիչներն արձանը ոչնչացրել են հունիսի 27-ին: «Սա Պալմիրայի ժառանգության դեմ ամենալուրջ հանցագործությունն է»,- նշել է ալ Քարիմն' ավելացնելով, որ մոտ երկու հազար տարվա հնություն ունեցող արձանը եզակի նմուշ էր, որն ուներ ավելի քան երեք մետր բարձրություն և կշռում էր մոտ 15 տոննա:

ԻՊ-ն համացանցում լուսանկարներ է հրապարակել, թե ինչպես է ոչնչացնում արձանը: Տեղեկություններ կան նաև, որ ոչնչացվել են վեց հնագույն արձաններ: Սիրիական հակամարտության սկզբից առյուծի արձանը ռմբակոծություններից պաշտպանել են երկաթե թիթեղներով և ավազե պարկերով:

Հակամարտության սկզբից ԻՊ-ն ոչնչացրել և ավերել է Սիրիայի տարածքում գտնվող մշակութային ժառանգության շուրջ 750 օբյեկտներ:

ԻՊ-ն մայիսին վերահսկողություն էր հաստատել Թադմուր քաղաքի վրա: Թադմուրի (Պալմիրա)՝ բաց երկնքի տակ թանգարան համարվող ավերակները, որոնք ձգվում են շուրջ երեք կիլոմետր, ներառված են ՅՈՒՆԵՍԿՕ-ի համաշխարհային ժառանգության ցանկում: Քաղաքը գտնվում է Սիրիայի մայրաքաղաք Դամասկոսից 204 կմ հեռավորության վրա: Հնությունների և թանգարանների վարչության պետ Մաամուն Աբդ ալ Քերիմն ավելի վաղ դիմել էր Սիրիայի օդային ուժերին և միջազգային հանրությանը՝ կոչ անելով պահպանել «սիրիական անապատի մարգարիտը»: