Բավակա՛ն է ընտրել գողերին, ավազակներին, սրիկաներին, ազգի դավաճաններին. Լևոն Տեր–Պետրոսյան (տեսանյութ)

Հայ ազգային կոնգրեսը շարունակում է նախընտրական քարոզարշավը: Ապրիլի 14-ին ՀԱԿ ղեկավար կազմը՝ ՀՀ առաջին նախագահ Լևոն Տեր-Պետրոսյանի գլխավորությամբ, շարունակեց իր մարզային հանրահավաք-հանդիպումները: Այսօր ՀԱԿ-ը հանդիպումներ էր անցկացնում Տավուշի և Գեղարքունիքի մարզերում:

«Սիրելի՛ ժողովուրդ, այստեղ շատ խոսվեց վախի մասին, բայց ուզում եմ ճշգրտում անել՝ դա չի վերաբերում այստեղ հավաքվածներին: Այստեղ վախեցած մարդ չկա: Վախեցածները տանն են, բայց իմացե՛ք՝ այդ վախեցածներն էլ հիմա տանը նստած գիշեր-ցերեկ հայհոյում են Սերժ Սարգյանին և նրա ստեղծած այս իշխանությունը: 100 տոկոսով ես վստահ եմ և գիտեմ՝ անգամ այդ վախեցածները մայիսի 6-ին քվեարկելու են մեր օգտին, ինչպես դա արել են էլի վախեցած մթնոլորտում, ինչպես դա արել են 1998-ին՝ ընտրելով Կարեն Դեմիրճյանին, 2003-ին՝ Ստեփան Դեմիրճյանին և 2008-ին՝ ընտրելով ինձ: Այդ վախեցածներն են ընտրել, իմացե՛ք: Եվ այդ վախեցածներից Սերժ Սարգսյանն ավելի շատ պետք է վախենա, քան ձեզանից: Մի անգամ նա փորձ արեց այդ վախեցածների մի միտինգ կազմակերպել 2008-ի փետրվարի 26-ին Լենինի հրապարակում՝ այժմյան Հանրապետության հրապարակում: Հավաքել էր 200.000 մարդ, նույն պահին մենք էլ Ազատության հրապարակում էինք, մի 200.000 մարդ էլ այնտեղ կար: 15 րոպե հետո, երբ Սերժ Սարգսյանը ելույթ ունեցավ, այդ 200.000 իր «կողմնակիցները», որոնք իբր թե քվեարկել էին նրա օգտին, թողեցին հրապարակը և եկան, միացան մեզ: Ահա սա է Սերժ Սարգսյանի ժողովուրդը: Ո՞վ է մեզ վախեցրել, մի խումբ գողեր և ավազակապետեր: Ո՞վ է Ռոբերտ Քոչարյանը: Ռոբերտ Քոչարյանը այսօր ավելի հարուստ է, քան մեր ամբողջ հանրապետությունը: Դուք գիտե՞ք դա: Սերժ Սարգսյանը ավելի հարուստ է, քան մեր հանրապետությունը: Դուք գիտե՞ք: Դրա մասին գրել են Մոսկվայի թերթերը: Իրենք պատասխան չեն տվել, Մոսկվայի թերթերին դատի չեն տվել: Հայաստանում, երբ նրանց մասին մի լրագրող մի բան է գրում, դատի են տալիս։ Դե տղա եք, գնացե՛ք Մոսկվային էլ դատի տվեք. սա է նրանց տղամարդկությունը... Հիմա ես ուզում եմ խոսել Ձեր թեկնածուի մասին: Անկեղծ ասում եմ, Սպարտակ Հարությունյանին ես չեմ ճանաչել: Բայց կարող եք հարցնել՝ ինչո՞ւ է նա հայտնվել ձեր ցուցակում: Ասեմ՝ մի պարզ պատճառով. մենք ծանոթացել ենք նրա կենսագրությանը, տեսել, որ պրոֆեսիոնալ մարդ է, ամբողջ կյանքում զբաղվել է արդյունաբերությամբ, մասնակցել է Արցախյան պատերազմին»,- Բերդ քաղաքում ելույթ ունենալով՝ նշեց Լևոն Տեր-Պետրոսյանը:

Խոսելով Սպարտակ Հարությունյանի մասին՝ Տեր-Պետրոյանն ասաց, որ նման հռետորը պատիվ կբերի և Հայաստանի Խորհրդարանին, և Ռուսաստանի խորհրդարանին:

«Բավակա՛ն է ընտրել գողերին, ավազակներին, սրիկաներին, ազգի դավաճաններին: Ո՞վ է այն մարդը, որ ժողովրդին մղում է արտագաղթի, ի՞նչ տարբերություն այս արտագաղթի կամ Օսմանյան Թուրքիայի կազմակերպած այդ տեղահանության հետ: Ի՞նչ տարբերություն: Եթե նույնն է, ուրեմն անողներն էլ են նույնը»,- ասաց առաջին նախագահը և հավելեց, որ պետք է ազատվել իշխող կառավարությունից:

«Վերանում ենք որպես ազգ, որպես ընտանիք: Բավակա՛ն է, դուք դա կարող եք անել»,- ասաց Տեր Պետրոսյանը և հավելեց, որ այս իշխանությունները չեն համարձակվի անել այն, ինչ արեցին 2008-ին, քանի որ նրանց ձեռքերը կապված են, և միջազգային հանրությունը շատ ավելի աչալուրջ և ուշադիր է, քան երբևէ: