Ե՛վ 1996, և՛ 2008 թվականին բռնության դիմել է Տեր-Պետրոսյանի հակառակորդը. Արման Մուսինյան

«Մենք շատ ենք շրջում, և՛ բակային, և՛ քաղաքային հանդիպումներ շատ ենք ունենում, և գրեթե չկա մի մարդ, որ Հանրապետական կուսկացությանը ձայն է տալիս իր խղճի մտոք», - երեկ Արմռադիոյի եթերում ասաց ՀԱԿ մամլո խոսնակ Արման Մուսինյանը՝ հավելելով, որ ՀՀԿ-ին կարող են ձայն տալ չինովնիկները, որոնք վախենում են աշխատանքը կորցնելուց, կարող են ձայն տալ մարդիկ, որոնք տնտեսական շահագրգռվածություն ունեն, «բայց չկա մի մարդ, որը որևէ առնչություն չունի կուսակցական կամ պետական ապարատի հետ կամ բիզնես շահերի հետ և ձայնը տա Հանարապետական կուսակցությանը»:

Հաղորդման ընթացքում Արման Մուսինյանին իրենց հարցերն էին հղում նաև Facebook սոցիալական ցանցի օգտատերերը։ Հարցին, թե ինչպե՞ս շարքային քաղաքացիները հավատան, որ ՀԱԿ-ը իսկապես պայքարում է ազատ, արդար և թափանցիկ ընտրությունների համար՝ աչքի առաջ ունենալով 1996 թվականի նախագահական ընտրությունների արատավոր փորձը, ՀԱԿ խոսնակը պատասխանեց. «Ես այս հարցին ունեմ երկու պատասխան. և՛ 1996 թվականին, և՛ 2008 թվականին, երբ Տեր-Պետրոսյանը մասնակցել է նախագահական ընտրություններին, երկու դեպքում ել բռնության դիմել է Տեր-Պետրոսյանի հակառակորդը: Բռնության դիմում են նրանք, որոնք քաղաքականության մեջ պարտվել են։ Ե՛վ 1996, և՛ 2008 թվականին Տեր-Պետրոսյանի հակառակորդները պարտվել էին: Սա առաջին նկատառումը։ Երկրորդ՝ 1996 թվականին Ազգային անվտանգության նախարար է եղել այժմ նախագահի աթոռը զավթած Սերժ Սարգսյանը, և կարծում եմ, որ այս հարցը պետք է ուղղել Բաղրամյան 26 հասցեում ներկայումս նստած Սերժ Սարգսյանին», - նշեց Արման Մուսինյանը:

Խոսելով այն բանի մասին, թե ինչպես է ՀԱԿ-ը փորձելու շահել ընտրազանգվածի ձայները՝ Արման Մուսինյանն ասաց. «Մենք շահելու ենք հետևյալ կերպ. ներկայացնելու ենք մեր անցած ուղին, ներկայացնելու ենք մեր մշակած ծրագրերը, գումարած մենք հնարավորինս մերկացնելու ենք այս բանդիտական ռեժիմի հանցավոր էությունը: Ովքեր կհավատան մեզ՝ ձայն կտան մեզ, ովքեր կհավատան ուրիշ քաղաքական ուժերի՝ ձայն կտան նրանց, և եթե ընտրություններն անցնեն արդար, մենք ուրախ կլինենք ողջունելու այն ուժին, որը կստանա առավելագույն ձայներ, բայց եթե ընտրություններն անցնեն ազատ և արդար, մենք վստահ ենք, որ հաղթողը կլինի Հայ ազգային կոնգրեսը», - նշեց ՀԱԿ մամլո խոսնակը: