Այսօր Արշիլ Գորկիի ծննդյան օրն է

Այսօր արևմտյան գեղանկարչության խոշոր վարպետ Արշիլ Գորկիի ծննդյան օրն է: Գորկին (հայկական անունը՝ Ոստանիկ Սեդրակի Ադոյան) ծնվել է 1904–ի ապրիլի 15–ին։ Ամերիկահայ նկարիչը, ծնվել է արևմտյան Հայաստանում՝ Վանի Հայոց ձոր նահանգի Խորգոմ գյուղում։ 1925 թ-ին վերցրել է ռուս ականավոր գրող Մաքսիմ Գորկու ազգանունը:

Գորկին նախնական կրթությունը ստացել է Խորգոմի և Վանի հայկական դպրոցներում։

1914–ին մոր՝ Շուշանիկ Տեր-Մարտիրոսյանի և երեք քույրերի հետ գաղթում են Էջմիածին, ապա տեղափոխվում Երևան։ Ոստանիկը սովորում է Երևանի թեմական դպրոցում, որտեղ ուսանում է նկարչություն և փայտի փորագրություն։

1916–ին մեծ քույրերը մեկնում են ԱՄՆ, 1919–ին մահանում է մայրը։ Ոստանիկը և քույրը տեղափոխվում են Թիֆլիս, հետո Բաթում, իսկ 1920–ին մեկնում են ԱՄՆ։

1924–ին տեղափոխվում է Նյու Յորք, սկզբում սովորում է Ազգային Ակադեմիայում, ապա Արվեստի Կենտրոնական դպրոցում, որտեղ էլ 1926-ից 5 տարի դասավանդում է գծանկար և գեղանկար։

1935–ին Գորկին ամուսնանում է Մարնի Ջորջի հետ, սակայն մեկ տարուց ամուսնալուծվում է։ 1939–ին մասնակցում է Նյու Յորքի համաշխարհային ցուցահանդեսի դեկորատիվ աշխատանքներին։ 1941 թ. ամուսնանում է Ագնես Մակգրոդերի հետ։ 1945–ին տեղափոխվում է Ռոքբուրի Կոնեկտիկուտ։ Պատրաստվում է Ջուլիան Լևի պատկերասրահում բացվելիք ցուցահանդեսին, սակայն 1946–ին այրվում են արվեստանոցը, 36 նկար և գրադարանը։ Նույն թվականին Գորկին տանում է քաղցկեղի վիրահատություն։ 1948–ին ավտովթարից վնասվում է ողնաշարը, որի պատճառով աջ ձեռքը դառնում է անաշխատունակ։

1948–ի հուլիսի 21–ին Գորկին ինքնասպան է եղել։