Թուրքիայում ցուցարարները պետությունից պահանջել են հեռու մնալ Սիրիայից

Ստամբուլում կազմակերպված հակակառավարական բողոքի ակցիայի ժամանակ Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) երիտասարդական թեւի հարյուրավոր ներկայացուցիչներ իշխանությունից պահանջել են հեռու մնալ Սիրիայից եւ չմիջամտել այդ երկրի ներքին պատերազմին:

Ինչպես հաղորդում է «Արմենպրես»-ը' վկայակոչելով թուրքական oda.tv հեռուստաալիքը, ակցիայի մասնակիցները Թուրքիային մեղադրել են Սիրիայի ժողովրդի դեմ ահաբեկիչների գործողություններին աջակցելու մեջ:

Ստամբուլի Քադըքյոյ հրապարակում անցկացված ակցիայի ժամանակ Թուրքիայի եւ Սիրիայի դրոշներ բռնած մասնակիցները «Ձեռքներդ հեռու Սիրիայից», «Ոչ Սիրիայի պատերազմին» բովանդակությամբ պաստառներ են պարզել եւ կարգախոսներ հնչեցրել:

Ակցիայի ժամանակ ունեցած ելույթում ԺՀԿ-ի երիտասարդական թեւի ղեկավար կազմի անդամ Բուրքան Դոզջան համոզմունք է հայտնել, որ Սիրիայի ճգնաժամի հենց սկզբից Թուրքիայի իշխող «Արդարություն եւ զարգացում» կուսակցությունը նպաստել է Սիրիայում կառավարական ուժերի դեմ կռվող «Իսլամական պետություն» ահաբեկչական խմբավորման համար վարձկանների եւ արմատականների պատրաստմանը, նրանց զինելու եւ մարզելու գործին:

Ակցիան կազմակերպվել է Սիրիայի ներքին պատերազմին միջամտելու հետ կապված Անկարայի որոշման դեմ: Թուրքիայի կառավարությունը հնարավոր է համարում մինչեւ 30 կմ խորությամբ Սիրիայի հետ սահմանին, այսպես կոչված, «անվտանգության գոտի» ստեղծելու նպատակով Սիրիա Թուրքիայի զինված ուժեր մտցնելը, եթե դա ստանա միջազգային հանրության հավանությունը: