Դավութօղլուն սկսել է կոալիցիոն կառավարություն ստեղծելու բանակցությունները

Թուրքիայի վարչապետի պաշտոնատար Ահմեթ Դավութօղլուն նախագահ Ռեջեփ Թայիփ Էրդողանի հանձնարարությամբ սկսել է հունիսի 7-ին անցկացված խորհրդարանական ընտրությունների արդյունքներով խորհրդարան անցած ընդդիմադիր կուսակցությունների հետ կոալիցիոն կառավարություն ստեղծելու բանակցությունները:

Ինչպես հաղորդում է «Արմենպրես»-ը' վկայակոչելով «Անատոլու» լրատվական գործակալությունը, այսօր Դավութօղլուն փոխվարչապետ Նուման Քուրթուլուշի, զարգացման նախարար Ջեւդեթ Յըլմազի, մշակույթի եւ զբոսաշրջության նախարար Օմեր Չելիքի եւ իշխող «Արդարություն եւ զարգացում» կուսակցության (ԱԶԿ) ստամբուլից ընտրված պատգամավցոր Այշե Նուրի հետ այցելել է գլխավոր ընդդիմադիր Ժողովրդահանրապետական կուսակցության (ԺՀԿ) գլխավոր գրասենյակ, որտեղ հանդիպել է կուսակցության առաջնորդ Քեմալ Քալըչդարօղլուի եւ նրա գլխավորած պատվիրակության հետ: Դավութօղլու-Քըլըչդարօղլու բանակցությունների մասին մանրամասներ չեն հաղորդվում:

Այնուհետեւ Դավութօղլուն ծրագրել է հանդիպել խորհրդարան անցած «Ազգայնական շարժում» եւ քրդական Ժողովուրդների դեմոկրատական (ԺԴԿ) կուսակցության առաջնորդներ Դեւլեթ Բահչելիի ու Սալահեթդին Դեմիրթաշի հետ:

Չնայած այն բանին, որ ԱԶԿ-ի հայացքներն ամբողջությամբ հակադիր են ԺՀԿ-ի հայացքներին, նրանք նույնությամբ են վերաբերվում Թուրքիայում քրդական խնդրի լուծման գործընթացին, որը սկսվել է 2009 թվականին, եւ նախաձեռնողը համարվում է Էրդողանը:

Բացի այդ, երկու կուսակցություններն էլ կողմնակից են Թուրքիայի' Եվրամիությանն անդամակցությանը եւ երկրում ժողովրդավարացման համար բարեփոխումների շարունակմանը:

Այս կողմերի միջեւ հիմնական տարաձայնությունը երկրի արտաքին, հատկապես, Սիրիայի գծով Անկարայի քաղաքականությունն է:

ԺՀԿ-ն դեմ էր հանդես եկել իշխող ԱԶԿ-ի սիրիական քաղաքականությանը եւ իշխանություններին կոչ էր արել երկրից արտաքսել սիրիացի փախստականներին, ինչպես նաեւ փակել Սիրիայի հետ սահմանը: Հենց դա է տվյալ կուսակցությունների կողմից կոալիցիոն կառավարություն ձեւավորելու գլխավոր խոչընդոտը:

Քրդական ԺԴԿ-ն արդեն հայտարարել է, որ դեմ չի լինի, եթե ԱԶԿ-ԺՀԿ կոալիցիոն կառավարություն ստեղծվի Թուրքիայում: Այդունահդերձ, ԺԴԿ առաջնորդ Դեմիրթաշը այսօր կազմակերպված մամուլի ասուլիսում հայտարարել է, որ Թուրքիայի կայուն ապագայի համար անհրաժեշտ է, որպեսզի ապագա կառավարությունը ստեղծվի ԱԶԿ-ԺԴԿ կոալիցիայի հիման վրա:

Հունիսի 7-ին Թուրքիայում անցկացված խորհրդարանական ընտրություններում ԱԶԿ-ն հավաքել է ձայների 40,8 տոկոսը, ԺՀԿ-ն' 25 տոկոսը, ԱՇԿ-ն' 16,3 տոկոսը, եւ ԺԴԿ-ն' 13,1 տոկոսը:

Թուրքիայի օրենսդրության համաձայն' եթե խորհրդարան անցած կուսակցություններից ոչ մեկը չի կարողանում զբաղեցնել խորհրդարանական 500 աթոռների կեսից ավելին, ապա երկրի նախագահի հանձնարարությամբ գործող վարչապետը ամենաշատ ձայներ հավաքած կուսակցության հետ երեք ընդդիմադիր կուսակցություննեիրից մեկի հետ 45 օրերի ընթացքում պետք է ձեւավորի կոալիցիոն կառավարություն: