Միակողմանի հրադադար հայտարարելը միամտություն էր. PKK-ի զինյալ թեւի առաջնորդ

Թուրքիայում քրդական խնդրի լուծման գործընթացը նախագահ Ռեջեփ Թայիփ Էրդողանի կողմից սառեցվելուց հետո Քուրդիստանի աշխատավորական կուսակցության (PKK) զինված թեւի առաջնորդներից Մուրադ Քարայըլանը հայտարարություն է արել սետղծված անորոշ իրավճակի հետ կապված: Նա հայտարարել է, որ իրենց կողմից միակողմանիորեն հրադադար հայտարարելը միամտություն էր:

Ինչպես հաղորդում է «Արմենպրես»-ը, IMC TV հեռուստաալիքի թղթակցի հետ զրույցում Քարայըլանն ասել է, որ իրենք միամտաբար հավատացել են Էրդողանի այն խոստմանը, որ անպայման սահմանադրական բարեփոխումներ են ընդունելու եւ կարգավորելու են քրդական խնդիրը' ինքնավարություն ստեղծելու ուղղությամբ:

Նրա խոսքով' հատկապես հունիսի 7-ին Թուրքիայում անցկացված խորհրդարական ընտրությունների շեմին Էրդողանի այն հայտարարությունից հետո, որ Թուրքիայում քրդական խնդիր գոյություն չունի, խնդրի լուծման գործընթացը դադարել է:

Քարայըլանը հիշեցրել է, որ Քուրդիստանի հասարակությունների միությունն (KCK) արդեն հայտարարել է PKK-ի կողմից դեռեւս անցյալ տարվա սեպտեմբերին հայտարարված միակողմանի հրադադարն ավարտվելու մասին:

«Հետագա զարգացումները ցույց տվեցին, որ միամտություն էր հավատալ իշխող «Արդարություն եւ զարգացում» կուսակցությանը (AKP) եւ միակողմանի հրադադար հայտարարել: Խնդրի ժողովրդավարական կարգավորման բոլոր հույսերն ի չիք են դարձել: Իշխող կուսակցությունը խախտել է բոլոր նախնական պայմանավորվածությունները», -ասել է նա:

Քարայըլանն ասել է, որ քրդական խնդրի լուծման գործընթացը վերացվել է Էրդողանի միջամտությամբ, երբ նա հայտարարել էր, որ «սեղանին նման հարց դրված չէ»:

«Այսինքն, այն բոլոր պայմանավորվածութունները, որ իշխանությունը ձեռք էր բերել Իմրալիում բանտարկված Աբդուլլահ Օջալանի հետ երկու եւ կես տարի շարունակ անցկացված բանակցությունների արդյունքում, այլեւս գոյություն չունեն: Դա խոսում է այն մասին, որ խնդրի լուծում, ինչպես պատկերացվում էր, այլեւ գոյություն չունի», -ընդգծել է նա:

KCK-ի առաջնորդը նշել է, որ զինաթափվելու մասին AKP-ի կոչերը «հանձնվելու» իմաստ են ստացել: Նա PKK-ի հետ քաշվելու ծրագրի հետ կապված ասել հետեւյալը.

«Դա կարող է լինել այն դեպքում, եթե կառավարությունը կատարի իր խոստումը եւ օրենսդրական ու սահմանադրական փոփոխություններ կատարի: Ապրիլին արդեն մենք հասկացանք, որ միամտորեն խաբվել ենք: Այժմ մենք սպասում ենք կոալիցիոն կառավարության ստեղծմանը: Դրա բնույթից ելնելով՝ կորոշենք մեր հետագա անելիքը», -ամփոփել է խոսքը Քարայըլանը: