Նիկոլ Փաշինյանի հայտարարությունը. Մալաթիա-Սեբաստիան՝ նորօրյա Օսվենցիմ (տեսանյութ)

Հայ ազգային կոնգրեսի անդամ, «Հայկական ժամանակ» օրաթերթի գլխավոր խմբագիր, թիվ 7 ընտրատարածքում պատգամավորության թեկնածու Նիկոլ Փաշինյանն այսօր կայացած մամլո ասուլիսի ժամանակ հանդես է եկել հայտարարությամբ, որն ամբողջությամբ ներկայացնում ենք ստորև։

1. 2012 թ ապրիլի 15-ին կեսօրից սկսած Երևանի Մալաթիա-Սեբաստիա համայնքում լրջագույն խոչընդոտներ են հարուցվել Հայ ազգային կոնգրես ընտրական դաշինքի և իմ՝ թիվ 7 ընտրատարածքում մեծամասնական ընտրակարգով ԱԺ պատգամավորի թեկնածու Նիկոլ Փաշինյանի բնականոն նախընտրական քարոզչության համար։ 

2. Ժամը 13։00-ի մոտակայքում ահազանգ եմ ստացել, որ Մալաթիա-Սեբաստիա համայնքի Սվաճյան 34 շենքի բակում ինչ-որ մարդիկ իմ վստահված անձանց արգելել են քարոզչական նյութեր տարածել։ 

3. Դեպքի վայր ժամանելով՝ Սվաճյան 34 շենքի բակում տեսել եմ մի խումբ մարդկանց, ովքեր ներկայանալով որպես հանրապետական կուսակոցության տեղի կառույցի ներկայացուցիչներ՝ ասել են, որ տվյալ տարածքում քարոզչություն չպետք է իրականացվի իմ կողմից, քանի որ իմ վստահված անձանց գլուխը կարող են ջարդել։ 

4. Նշված անձանց բացատրելով, որ իրենց հարուցած խոչընդոտներն ապօրինի են, վերսկսել եմ քարոզչական նյութերի տարածումը տվյալ տարածքում և իմ ու վստահված անձանց առաջ հարուցված խոչընդոտների մասին ահազանգել եմ ՀՀ ոստիկանության Երևանի Մալաթիա-Սեբաստիայի բաժին։ 

5. Որոշ ժամանակ անց ժամանել են ոստիկանության ներկայացուցիչներ, իսկ հետաքննիչն ինձ առաջարկել է բացատրություններ տալ։ Հենց տեղում սկսել եմ բացատրություններ տալ, և այն ժամանակ, երբ պետք է սկսեի կոնկրետ մատնանշել իրավախախտում թույլ տված անձանց, ժամանել է Մալաթիա-Սեբաստիա վարչական շրջանի ղեկավար Դավիթ Օհանյանը, որը Սամվել Ալեքսանյանի՝ Լֆիկ Սամոյի դրածոն է այդ պաշտոնում։

6. Դավիթ Օհանյանը զրույցի է բռնվել ոստիկանների հետ, կարճ զրույցի փորձ է ունեցել ինձ հետ, որից հետո դեպքի վայր են ժամանել մի խումբ կանայք՝ պայուսակներով, ոչ տնային շորերով։ Ժամանած կանանց առաջին խմբի մի շարք ներկայացուցիչներ ջերմագին ողջագուրվել են Դավիթ Օհանյանի հետ, որից հետո Օհանյանը հեռացել է, իսկ կանայք սկսել են «ի պաշտպանություն Սամվել Ալեքսանյանի» ցույցը։

7. Նշված ցույցը տևել է 30 րոպե, որի ընթացքում իմ վստահված անձինք ավարտել են նախատեսված քարոզչական նյութերի բաժանումը Սվաճյան 32, 34, 36, 38, 40 շենքերում և ինձ տեղեկացրել իրենց մոտ եղած քարոզչական նյութերի սպառվելու մասին։ Նշված մասում նախատեսված քարոզչական աշխատանքն ավարտելուց հետո վերադարձել եմ Մալաթիա-Սեբաստիա համայնքում Հայ ազգային կոնգրեսի կենտրոնական շտաբ և շարունակել քարոզչական աշխատանքների համակարգումը։ Վերադարձի ճանապարհին Սուրբ Երրորդություն եկեղեցու հարևանությամբ տեսնում եմ «ՎԱԶ» մակնիշի 2 ավտոբուս, որոնցով, ըստ ականատեսների, 34 շենքի բակ է բերվել «ի պաշտպանություն Սամվել Ալեքսանյանի» ցույցի մասնակիցների զգալի մասը։

9. Ժամը 15։00-ից հետո Մալաթիա-Սեբաստիա համայնքի տարբեր հատվածներում քարոզչական նյութեր տարածող իմ վստահված անձանցից ահազանգեր եմ ստացել իրենց առաջ հարուցված ապօրինի խոչընդոտների մասին և բոլոր դեպքերի մասին հաղորդել եմ ոստիկանության ներկայացուցիչներին։ 

10. Երեկոյան կողմ Մալաթիա-Սեբաստիա են ժամանել Հայ ազգային կոնգրեսի անդամ, ԱԺ պատգամավորի թեկնածու Զոյա Թադևոսյանը, Գայանե Առուստամյանը, Բաբկեն Գարոյանը՝ «ժողովրդի իշխանություն» նախաձեռնության ակտիվիստների ուղեկցությամբ։ Նրանք միացել են Անդրանիկի, Շերամի, Սվաճյան փողոցներում քարոզչական նյութերը տարածող իմ վստահված անձանց խմբին։

11. Սվաճյան 44 շենքում Թադևոսյանը, Առուստամյանը, Գարոյանը ենթարկվել են բռնության, Գարոյանը ստացել է մարմնական վնասվածք։

12. Երեկոյան կողմ կրկին ակտիվացել են ահազանգերը իմ վստահված անձանց առաջ հարուցված խոչընդոտների մասին, ինչի մասին տեղյակ եմ պահել ոստիկանության ներկայացուցիչներին։ 

13. Երեկոյան անձամբ քարոզչություն եմ իրականացրել Շերամի 11 շենքի մերձակա հատվածում, որտեղ մինչ այդ խոչընդոտվել է իմ վստահված անձանց գործունեությունը, ապա օրվա ավարտին վստահված անձանց թիմի հավաք եմ անցկացրել Հայ ազգային կոնգրեսի Մալաթիա-Սեբաստիայի կենտրոնական շտաբում։ 

14. Օրվա վերջում Մալաթիա-Սեբաստիայի ոստիկանության ներկայացուցիչներն ինձ և որոշ դեպքերում՝ իմ վստահված անձանց ուղեկցել են քարոզարշավի իրականացման ընթացքում։ 

15. Ապրիլի 15-ի ուշ երեկոյան իմ ահազանգով ոստիկանության Կենտրոնի բաժին բերման է ենթարկվել Opel մակնիշի ավտոմեքենան, որը մի քանի ժամ շարունակ հետևել է իմ տեղաշարժերին։ Ի դեմս բերման ենթարկված երկու անձանցից մեկի ճանաչել եմ Մալաթիա-Սեբաստիայում տեղի ունեցած խժդժությունների ամենաակտիվ մասնակիցներից մեկին։

16. Իմ վստահված անձանց և թիմակիցների նկատմամբ կիրառված ապօրինությունները համարում եմ ՀՀԿ–ի և Լֆիկ Սամոյի արձագանքը Մալաթիա-Սեբաստիայում Հանրապետական կուսակցության և նրա առաջադրած մեծամասնական թեկնածուի նախընտրական վիճակի վատթարացմանը։

17. Հարկ եմ համարում ընդգծել, որ լֆիկական ռեժիմի ներքո հայտնված Մալաթիա-Սեբաստիա համայնքը նախընտրական քարոզարշավի այս օրերին տեղ-տեղ երևակվում է որպես մի նորօրյա Օսվենցիմ, որի գերիների ազատագրման համար պայքարը համարում եմ իմ քաղաքական պայքարի կարևորագույն նպատակներից մեկը և հանուն այդ նպատակի իրագործման մտադիր եմ մերդնել առավելագույն ջանքեր։

18. Նախընտրական քարոզչության այս փուլում արձանագրում եմ, որ թիվ 7 ընտրատարածքում հաղթելու Հայ ազգային կոնգրեսի և իմ՝ որպես մեծամասնական ընտրակարգով առաջադրված թեկնածուի շանսերը հսկայական են։ 

19. Իմ հայտարարության հրապարակումից հետո իմ վստահված անձանց թիմի հետ պատրաստվում եմ շարունակել քարոզչությունը Մալաթիա-Սեբաստիա համայնքում ամենօրյա ռեժիմով։ 

 

Տեսանյութը՝ Հելսինկյան ասոցիացիայի