Նախատեսվում է ունենալ 4000 դիտորդ. «Ընտրությունը քոնն է» ՀԿ

Մայիսի 6-ին կայանալիք խորհրդարանական ընտրություններին դիտորդական առաքելություն են իրականացնելու 31 տեղական կազմակերպություն: Դրանց թվում է նաև «Ընտրությունը քոնն է» հասարակական կազմակերպությունը: Լուրեր.com-ի հետ զրույցում ՀԿ-ի մամլո քարտուղար Հասմիկ Սարգսյանն ասաց, որ կազմակերպությունը պատրաստվում է դիտորդական աշխատանքներ իրականացնել բոլոր ընտրական տեղամասերում, այդ նպատակով կազմակերպել է դիտորդների ուսուցման դասընթացներ՝ Երևանում և բոլոր մարզերում:

«Նախատեսվում է ունենալ 4000 դիտորդ և, ինչպես ընտրական օրենսգիրքն է պահանջում, այդ օրենքի համաձայն՝ ուսուցումներից հետո հաջորդել են ԿԸՀ-ի կողմից անցկացվող ստուգարքները և այդ ստուգարքների արդյունքում ստանում են վկայագրեր, որոնք թույլ կտան մեր դիտորդներին ներկա լինել ընտրական հանձնաժողովների նիստերին: Դրանից բացի նաև մենք իրականացնում ենք երկարաժամկետ դիտարկումներ. կդիտարկեն քարոզարշավները և ընդհանրապես ընտրական գործընթացներին վերաբերող բոլոր երևույթները: Ընտրությունների օրվա քվեարկության գործընթացի և ձայների հաշվարկի գործընթացների դիտարկումից հետո բոլոր փաստերը մենք կհավաքագրենք կենտրոնական գրասենյակում և իհարկե մեր դիտարկումների վերաբերյալ նախնական արդյունքները կներկայացնենք, որովհետև ընտրությունների դիտարկման մեր փորձը, մեր գործունեության ձեռագիրը հետևյալն է. բոլոր փաստերը հավաքագրել, կազմակերպության կողմից հանդես գալ նախնական զեկույցով և այնուհետև ներկայացնել վերջնական զեկույց: Սա մեր աշխատելաոճն է, աշխատանքի ձեռագիրը: Պետք է մեր ձեռքի տակ լինեն փաստեր, եթե որևէ բան արձանագրում ենք, դա պետք է լինի փաստագրված, դրանք չպետք է դատարկ խոսակցություններ լինեն: Առայժմ իրականացվում է նախնական շրջանի դիտարկում և որոշակի պարբերականությամբ մեր երկարաժամկետ դիտորդները հաշվետվություններ են ներկայացրել, մենք ամփոփում ենք և, բնականաբար, եթե կլինեն փաստեր մենք դրանք կարձանագրենք», - նշեց Սարգսյանը:

Իսկ ինչպե՞ս է կազմակերպությունը պատրաստվում պայքարել ընտրակեղծիքների դեմ, հարցին ի պատասխան Հասմիկ Սարգսյանն ասաց. «Ընտրական օրեսգրքով դիտորդն ունի որոշակի իրավունքների շրջանակ: Նրա իրավունքն է, պարտականությունն է դիտարկել, արձանագրել փաստերը, դրա վերաբերյալ մեզ տեղեկացնել: Հատկապես քվեարկության օրը, ձայների հաշվարկի ժամանակ հստակ օրենսգրքում ասված է, որ դիտորդն ունի որոշակի իրավունքներ՝ ազատորեն դիտարկել, այնտեղ գրված է՝ առանց ընտրական հանձնաժողովի աշխատանքներին խանգարելու, խոչընդոտելու: Եթե որոշակի խախտում տեսնում է, նա իրավունք ունի նույն պահին հայտնել ընտրական հանձնաժողովի նախագահին՝ այն կանխելու համար: Դիտորդը հասարակության աչքն է, ականջը տեղամասում: Մեր կազմակերպությունը հաշվետվություն կներկայացնի իր դիտարկումների վերաբերյալ», - ասաց Հասմիկ Սարգսյանը: