Թուրքիան հրաժարվում է տարանցման համաձայնություն տալ ռուսաստանյան գազին

Թուրքիայի էներգետիկայի նախարար Թաներ Յըլդըզը հայտարարել է, որ երկիրը զիջումների չի գնա ռուսաստանյան «Գազպրոմ» ընկերությանը «Թուրքական հոսք» նախագծի իրականացման հարցերում, որը պետք է թույլ տա շրջանցելով Ուկրաինան գազ արտահանել Եվրոպա:

Այս մասին, ինչպես հաղորդում է «Արմենպրես»-ը, հայտնում է «Ռոսբալտ»-ը:

«Մոսկվան մեզ միայն տարանցող երկիր է տեսնում: Մեզ համար դրանում ոչ մի իմաստ չկա: Մենք շահագրգռված ենք համատեղ մատակարարումներ ստեղծելու մեջ: Այդ հարցի հետ կապված սկզբունքային համաձայնություն ձեռք էր բերվել, սակայն Ռուսաստանն իր տված խոսքից հրաժարվում է», -նշել է նա:

Թուրք նախարարի խոսքով' «Թուրքական հոսք»-ը պետք է համապատասխանի ինչպես Մոսկվայի, այնպես էլ Անկարայի շահերին:

«Մենք երբեք այնպիսի զիջումների չենք գնա, որոնք սպառնում են մեր շահերին», -ասել է Յըլդըզը` հավելելով, որ խնդիրը չի կարող է լուծվել միայն գազի գնի հարցում զեղջման գնալով:

Ավելի վաղ ասվում էր, որ Ռուսաստանից Սեւ ծովի հատակով Թուրքիայի արեւմտյան մաս գազի փոխադրման «Թուրքական հոսք» գազատարի առաջին գիծը պետք է շահագործման հանձնվի 2016 թվականին: Այն պետք է Թուրքիայի արեւմտյան մասը բավարարի գազով ուրկրաինական տարանցման փոխարեն: «Թուրքական հոսք»-ի հաջորդ երեք գծերը նախատեսված են կենտրոնական եւ հարավային Եվրոպայի երկրներ ուկրաինական տարանցման փոխարեն գազի մատակարարումների համար: Ենթադրվում է, որ գազատարի հզորությունը կկազմի տարեկան մինչեւ 60 մլրդ խոր.մ գազ: