ԱՄՆ ՄԶԳ-ն կաջակցի բռնության զոհ դարձած կանանց մատուցվող ծառայությունների բարելավմանը

ՀՀ աշխատանքի և սոցիալական հարցերի նախարար Արթուր Գրիգորյանը, Հայաստանի Հանրապետությունում ԱՄՆ դեսպան Ջոն Ա. Հեֆֆերնը և ԱՄՆ ՄԶԳ հայաստանյան գրասենյակի տնօրեն Ջաթինդեր Չիման ստորագրեցին երկու համաձայանգիր, որոնց շրջանակում գործակալությունն աջակցություն կտրամադրի նախարարության «Կենսաթոշակային իրազեկումն ու ֆինանսական կրթությունը Հայաստանում» և «Ընտանեկան բռնության զոհ դարձած կանանց մատուցվող ծառայությունների որակի բարձրացումը Հայաստանում» ծրագրերի մի շարք բաղադրիչների իրականացման համար:

«Կենսաթոշակային բարեփոխումների հաջողության հիմնական գրավականներից մեկն այն է, որ շահառուները՝ ներկայիս և ապագա կենսաթոշակառուները, խորությամբ ծանոթանան համակարգին, կենսաթոշակի կուտակման և ստացման տարբերակներին, զարգացնեն կենսաթոշակային հաշիվները կառավարելու իրենց ունակությունները: Գրագետ որոշումներ կայացնելու համար անհրաժեշտ են բազային և կիրառական գիտելիքներ ֆինանսների մասին ընդհանրապես և կենսաթոշակային համակարգի մասին՝ մասնավորապես»,-նշեց պարոն Գրիգորյանը:

Վերոնշյալ աշխատանքներն իրականացնելու նպատակով հիմնադրվել է «Կենսաթոշակային համակարգի իրազեկման կենտրոն»հիմնադրամը (ԿՀԻԿՀ), որի առջև խնդիր է դրվել իրականացնելու կենսաթոշակային բարեփոխումների իրազեկման և ֆինանսական գրագիտության բաղադրիչը՝ ՀՀ աշխատանքի և սոցիալական հարցերի, Էկոնոմիկայի, Ֆինանսների, արդարադատության նախարարությունների, Կենտրոնական բանկի, ՀՀ Կառավարության աշխատակազմի և Պետական եկամուտների կոմիտեի հետ համագործակցությամբ:

Սույն Ծրագիրը նպատակ ունի աջակցելու ԱՍՀՆ-ին ԿՀԻԿ հիմնադրամի կարողությունների հզորացման միջոցով 2012թ. ընթացքում իրականացնելու հանրային իրազեկման արշավներ և ֆինանսական գրագիտության բարձրացմանն ուղղված արդյունավետ միջոցառումներ:
2.ԱՄՆ ՄԶԳ հայաստանյան գրասենյակը պատրաստակամություն է հայտնել աջակցել Հայաստանի Կառավարությանն ընտանեկան բռնության ենթարկված կանանց մատուցվելիք ծառայությունների ընդլայնման ուղղությամբ: Համատեղ իրականցվելիք Ծրագիրը կնպաստի բռնության ենթարկված անձանց տրամադրվող ծառայությունների բարելավմանն ու հզորացմանը և գենդերային բռնության ենթարկված անձանց պաշտպանությանն ու նրանց տրամադրվող ծառայությունների առավել արդյունավետ կազմակերպմանը:

ՀՀ–ում ԱՄՆ դեսպանը կարևորեց համաձայնագրերի ստորագրումը: «Սա երկրորդ դեպքն է, երբ գործակալությունն ուղղակի աջակցություն է տրամադրում նախարարությանը: Դրամաշնորհները կօգնեն հասարակությանը՝ խորությամբ ըմբռնելու կենսաթոշակային բարեփոխումների էությունը, իսկ երկրորդ ծրագրի իրականացումը հիմնաքար կլինի ՀՀ կառավարության և իրավապահ մարմինների համար՝ պարզելու բռնության ենթարկված կանանց աջակցելուն ուղղված հետագա քայլերը»,- նշեց պարոն Հեֆֆերնը: