Ադրբեջանը պետք է Թուրքիային ռազմական աջակցություն ցուցաբերի. քաղաքագետ

Սիրիայում գործող «Իսլամական պետություն» (ԻՊ) ահաբեկչական խմբավորման դեմ Թուրքիայի սկսած օդային ռազմական հարվածների հետ կապված Ադրբեջանում կոչեր են հնչում այն մասին, որ այդ գործողություններում թուրքերին ռազմական աջակցություն պետք է ցուցաբերեն նաև Ադրբեջանի զինված ուժերը:

Ինչպես հաղորդում է «Արմենպրես»-ը, նման առաջարկով ադրբեջանական «Հուրիյեթ» թերթի հետ զրույցում հանդես է եկել «Արևելք-Արևմուտք» հետազոտական կենտրոնի ղեկավար, քաղաքագետ Արաստուն Օրուջլուն:

Նրա կարծիքով' ամբողջ աշխարհի համար գլխացավանքի վերածված ԻՊ-ի դեմ Թուրքիայի սկսած ռազմական գործողությունները կարող են հակառակ ազդեցությունը տալ. դա կարող է զայրացնել ահաբեկչական խմբավորմանը և այն, հնարավոր է, Թուրքիային դարձնի իր գլխավոր թիրախը:

Օրուջլուն գտնում է, որ ինչպես հակաահաբեկչական և մարտական փորձ ձեռք բերելու, այնպես էլ Թուրքիային աջակցելու համար, թեկուզ սահմանափակ թվաքանակով, Ադրբեջանն այսօր պետք է թուրքական զինուժի կազմում մասնակցի ԻՊ-ի դեմ ռազմական գործողություններին:

«Թուրքիայի ռազմական գործողություններում Ադրբեջանի զինվորականների՝ գործնական մարտական փորձի ձեռքբերումն օգտակար է: Դա նաև կարևոր է միջազգային քաղաքական հրապարակում Թուրքիային աջակցություն ցուցաբերելու տեսակետից: Քանի որ ինչքան էլ ցավալի լինի, պետք է խոստովանել, որ այդ ահաբեկչության ալիքը վաղ, թե ուշ հասնելու է նա Ադրբեջան: Այդ պատճառով, ինչպես այդ վտանգը ժամանակին կանխելու, մարտական և հակաահաբեկչական փորձը լավացնելու, այնպես էլ այդ գործում Թուրքիային աջակից լինելու համար անհրաժեշտ է, որ Ադրբեջանը մասնակցի այդ ռազմական գործողություններին»,-ասել է ադրբեջանցի քաղաքագետը: