Թուրքիայում ձերբակալվել է ԻՊ-ի ադրբեջանցի հրահանգիչ Աբդուլլաևը

Թուրքիայի իրավապահ մարմինների կողմից Ստամբուլում անցկացված հակաահաբեկչական գործողությունների շրջանակում հուլիսի 28-ին ձերբակալվել է «Իսլամական պետություն» (ԻՊ) ահաբեկչական խմբավորման «Ստամբուլի էմիր» մականունով ադրբեջանցի հրահանգիչ Աբդուլլահ Աբդուլլաեւը:

Այս մասին, ինչպես հաղորդում է «Արմենպրես»-ը, հայտնում է թուրքական «Դողան» լրատվական գործակալությունը:

Ծագումով ադրբեջանցի Աբդուլլա Աբդուլլաեւը Թուրքիայի տարածքում «Իսլամական պետություն» (ԻՊ) ահաբեկչական խմբավորման առանցքային դեմքերից մեկն է:

Ըստ թուրքական ԶԼՄ-ների' Աբդուլլաեւը Թուրքիայում Եվրոպայից եւ Միջին Ասիայից ժամանող ԻՊ-ի մարտիկների համար փոխաբեռնման կետ է ստեղծել, որոնց հետագայում փոխադրել է Սիրիա եւ Իրաք:

Ադրբեջանցին Թուրքիայում տասնյակ բնակարաններ է վարձել, որտեղ ժամանակավորապես բնակվել են ԻՊ-ի ապագա մարտիկները:

Թուրքական իրավապահ մարմինների կողմից հուլիսի 27-ին անցկացված հատուկ գործողության ընթացքում բերման են ենթարկվել 36 մարդ, որոնք այսպես, թե այնպես կապված են Աբդուլլա Աբդուլլաեւի հետ: ԻՊ-ի մարտիկների դեմ թուրքական իրավապահ մարմինների հատուկ գործողությունն անցկացվել է «Աբդուլլաեւ» ծածկագրի տակ:

Ադրբեջանական ԶԼՄ-ներն ավելի վաղ հայտնել էին, որ Սիրիայում ապստամբների կողմից նախագահ Բաշար Ասադի դեմ կռվում են 1500-ից ավելի Ադրբեջանի քաղաքացիներ, իսկ Սիրիայում եւ Իրաքում ամբողջ պատերազմի ընթացքում ոչնչացվել են 300-ից ավելի ադրբեջանցիներ: Թուրքական իրավապահ մարմինները խոստովանել են, որ ադրբեջանցիները ԻՊ-ին միանալու համար Սիրիա եւ Իրաք են մեկնում Թուրքիայի տարածքով:

2013 թ-ի մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ հանուն հավատի) կատարել Սիրիայում: