Իրանի նախագահ Մահմուդ Ահմադինեժադը Հայաստան կայցելի տարեվերջին

Նոյեմբերի 8-ին ԱԳ նախարար Էդվարդ Նալբանդյանը հանդիպեց աշխատանքային այցով Երևան ժամանած իր իրանցի գործընկեր Ալի Աքբար Սալեհիին։ Ողջունելով հյուրի՝ պաշտոնավարման ընթացքում Հայաստան կատարած առաջին այցելությունը՝ ԱԳ նախարար Էդվարդ Նալբանդյանը բարձր գնահատեց հայ-իրանական պատմականորեն ձևավորված ամուր բարեկամական հարաբերությունները, որոնք երկուստեք ջանքերի շնորհիվ շարունակում են վերընթաց զարգացում ապրել։

Ալի Աքբար Սալեհին, շնորհակալություն հայտնելով ջերմ ընդունելության համար, նշեց, որ շատ ուրախ է բարեկամ Հայաստան այցելելու հնարավորության համար: Իրանի արտգործնախարարն ասաց, որ իր երկիրը մշտապես բարձր է գնահատել հարևան Հայաստանի հետ հարաբերությունների առավել զարգացումը, և շարունակելու է հետևել իր որդեգրած քաղաքականությանը։

Զրույցի ընթացքում արտգործնախարարներ Նալբանդյանն ու Սալեհին անդրադարձան այս տարվա վերջին նախատեսված Իրանի նախագահ Մահմուդ Ահմադինեժադի Հայաստան կատարելիք այցի նախապատրաստական աշխատանքներին։

Հանդիպմանը քննարկվեցին երկկողմ հարաբերությունների քաղաքական, տնտեսական, միջխորհրդարանական, էներգետիկ, տրանսպորտային, կրթամշակութային, ապակենտրոնացված և զբոսաշրջության ոլորտներում համագործակցությանն առնչվող հարցեր:

Էդվարդ Նալբանդյանն ու Ալի Աքբար Սալեհին խոսեցին նաև հայ-իրանական միջկառավարական հանձնաժողովի շրջանակներում ձեռք բերված պայմանավորվածությունների իրականացման ընթացքից։

Արտգործնախարարներ Նալբանդյանն ու Սալեհին մտքեր փոխանակեցին միջազգային և տարածաշրջանային հիմնախնդիրների շուրջ։ Նախարարների հանդիպմանը հաջորդեց համատեղ մամուլի ասուլիս։