Էլիտայում հայտնվում են մարդիկ, որոնք դրա իրավունքը չունեն. Արամ Գասպարի Սարգսյան

«Ընտրակաշառքը դարձել է համատարած, այն դարձել է մուրացկանության նոր ձև՝ շաքարավազ, մուրաբա, կոնֆետ: Թող խայտառակ լինեն այն կուսակցությունները, որոնք դրանով զբաղվում են»,-այս մասին այսօր լրագրողների հետ հանդիպման ժամանակ ասաց Դեմոկրատական կուսակցության ղեկավար Արամ Սարգսյանը և հավելեց նաև, որ մարդիկ ահաբեկված են և վախենում են, որ եթե իրենց ձայնը տան ոչ իշխանական կուսակցությանը, ապա իրենց կհեռացնեն աշխատանքից:

Դեմկուսի ղեկավարը անդրադարձավ ընտրություններից առաջ սկսված շինարարություններին և նշեց, որ համատարած ասֆալտապատումը, վերելակների և տանիքների վերանորոգումը սկսվել է հենց ընտրություններից առաջ։

«Մարդիկ մրցում են, թե ով տանիք վերանորոգի»,- ասաց Սարգսյանը և հավելեց, որ պետությանը պետք է վերադարձվեն մեծ շահույթ ստացող օբյեկտները, պետք է մշակվի զարգացման ռազմավարություն, իսկ ընդերքը պետք է լինի պետության սեփականություն. այն չի կարելի նվիրել օտարին կամ անհատին:

Սարգսյանի խոսքերով՝ Դեմոկրատական կուսակցությունն ասում է, որ այս համակարգն ամբողջովին պետք է փոփոխվի:

«Մենք գնում ենք լյումպենացված էլիտայի ձևավորմանը։ Էլիտայում հայտնվում են մարդիկ, որոնք դրա իրավունքը չունեն»,- ասաց նա։

Դեմկուսի ղեկավարը նշեց նաև, որ այս պահին «մենք ավելի շատ աշխատում ենք այն խավի հետ, որի ներկայացուցիչներն ինքնուրույն որոշում են կայացնում»: Սարգսյանի խոսքերով՝ այդ մտածող մարդիկ ընդամենը 30 տոկոս են կազմում:

«Մենք շատ շնորհակալ կլինենք, եթե նրանք մեր օգտին որոշում կայացնեն: Հասարակությունը հիմա հստակ ընկալում է մեր գաղափարախոսությունը, և մեր խնդիրն է, թե ինչպես ներկայանանք այդ խավին: Մենք կուզեինք, որ մեզ ձայն տային 40-50 տոկոս, բայց տեսնենք, թե ինչպես կլինի: Մեր հնարավորությունները համեստ են, բայց ո՛չ մտավորական տեսակետից, այլ՝ ֆինանսական»,-ասաց Սարգսյանը: