Մարզերում մենք ևս ունենք մեծ ընտրազանգված. Հովսեփ Խուրշուդյան

«Ժառանգություն» կուսակցության մամլո խոսնակ Հովսեփ Խուրշուդյանը երեկ՝ Հայկական երկրորդ հեռուստաալիքով հեռարձակվող «Խոսքի իրավունք» հաղորդման ժամանակ խոսեց ընթացող քարոզարշավի մասին. «Ամենակարևորն այն էր, որ, եթե մենք մինչև այժմ մտածում էինք, որ մեր հիմնական ընտրազանգվածը Երևանում է կենտրոնացած, մարզային այս այցելությունները ցույց տվեցին, որ դա այդպես չէ, և մարզերում մենք ևս ունենք մեծ ընտրազանգված և որ ամենակարևորն է, այս մեկ շաբաթը, ինչ տևում է մարզային քարոզարշավը, բավականին լուրջ դինամիկա ենք նկատում: Օրինակ՝ սկզբում այնքան մարդաշատ հանրահավաքներ և հանդիպումներ չէր լինում, ինչքան այս օրերին»: Հովսեփ Խուրշուդյանի կարծիքով՝ դրանում մեծ է քարոզչական տեսահոլովակների դերը, որոնք ցուցադրվում են տարբեր հեռուստատեսություններով, որոնց միջոցով իրենք քաղաքացիներին են ներկայացնում իրենց մոտեցումները՝ հիշեցնելով, թե ինչ է արվել այս հինգ տարիների ընթացքում:

«Ես բավական դրական եմ գնահատում այս ընտրությունների լուսաբանումը՝ ի տարբերություն նախորդ տարիների ընտրությունների: Դա մեզ հնարավորություն է տալիս ներկայացնել այն, ինչ արվել է, ինչպես նաև մեր հիմնական ուղերձը: Հատուկ ցուցադրական խնդիր մենք չունենք, որ ամեն տեղ ցույց տանք, ինչպես անում են ուրիշ կուսակցություններ: Իրենց հետ շրջում են համակիրների մի քանի ավտոբուսներ և ամեն գյուղում այդ նույն մարդիկ հանդիպումներ են անում. տպավորությունն այնպիսինն է, որ ամբողջ գյուղը հավաքվել է հանդիպմանը», - նշեց Հովսեփ Խուրշուդյանը:

Նրա խոսքերով՝ իրենց դեպքում եթե գյուղում ընդամենը մի քանի հոգի է լինում, որոնք կարող են մասնակցել հանդիպմանը, «Ժառանգություն»–ը գնում և հանդիպում է նրանց հետ, շրջում գյուղով։