Մենք գալիս ենք ձեր ընտրելու իրավունքը ձեզ վերադարձնելու համար. Լևոն Տեր–Պետրոսյան

Երեկ Հայ Ազգային կոնգրեսն իր մարզային այցերի շրջանակներում այցելել էր Մասիս, Արտաշատ և Արարատ։ Մասիսում ՀՀ առաջին նախագահ Լևոն Տեր–Պետրոսյանն իր ելույթը սկսեց՝ անդրադառնալով հանդիպմանը ներկա մարդկանց փոքրաթիվ լինելու հանգամանքին։

Տեր–Պետրոսյանը, ի տարբերություն իր թիմակիցների, կարծում է, որ Մասիսի բնակիչների պասիվության պատճառը վախը չէ։ Ըստ նախագահի՝ կա երկու պատճառ. ա) Վերջին չորս տարիների ընթացքում Հայաստանի ակտիվ բնակչության մեծ մասը հեռացել է Հայաստանից, բ) նախագահական ընտրությունների ժամանակ է, որ ժողովուրդը մոբիլիզացվում է՝ ինչ–որ փոփոխության հասնելու հնարավորություն տեսնելով։

Նախագահը փաստեց, որ ժողովուրդը վախեցած չէ, և այդ մասին է վկայում ընտրություններին՝ նրա կատարած ճիշտ ընտրությունը, քանի որ1998-ին նա իր քվեն տվել է Կարեն Դեմիրճյանին, 2003-ին՝ Ստեփան Դեմիրճյանին, իսկ 2008-ին հենց Տեր–Պետրոսյանին։ Իսկ արդյունքում ստացված «հաղթանակները» եղել են ընտրակեղծիքների արդյունք։

«Բա ինչո՞ւ տեղի չի ունենում փոփոխությունը, կհարցնեք դուք։ Որովհետև այս իշխանություններն օգտվում են միջազգային հանրության օգնությունից։ Նրանց պետք է այսպիսի իշխանություն. Հայաստանում Արևմուտքին պետք է Սերժ Սարգսյանի, Ռոբերտ Քոչարյանի ստեղծած գող, ավազակ, թույլ իշխանությունը, որովհետև նրանց կառավարելը հեշտ է, որովհետև նրանք կկատարեն իրենց ամեն մի ցանկություն», – իր ելույթի ընթացքում նշեց Տեր–Պետրոսյանը՝ նաև հարցնելով, թե ո՞ր ուժեղ իշխանությունը կհամաձայներ հայ և թուրք պատմաբանների հանձնաժողով ստեղծել՝ պարզելու համար ցեղասպանության լինել–չլինելու հարցը։

Ըստ նախագահի՝ դա վկայում է այն մասին, որ այս իշխանությունն անկախ չէ։ «Ես ավելին կասեմ՝ Սերժ Սարգսյանը նրանց այդ խոստումը տվել է, որ համաձայնելու է ստեղծել այդ հանձնաժողովը։ Վիկիլիքսի փաստաթղթերում դա կա։ Այդ խոսակցությունը նրա հետ ունեցել են 2007թ.–ի ամռանը», – նշեց նա՝ ավելացնելով, որ Սերժ Սարգսյանն ընտրություններից առաջ նրանց նաև խոստացել է Ղարաբաղի հարցի լուծման Մադրիդյան սկզբունքների տակ ստորագրել։

Տեր–Պետրոսյանը հիշեցրեց, որ դա հենց այն փաստաթուղթն է, որի վրա ինքը ժամանակին Լիսաբոնում վետո է դրել՝ չնայած ԱՄՆ–ի բոլոր փորձերին՝ համոզել իրեն ստորագրել այդ սկզբունքների տակ։ «Նույն փաստաթուղթն է, բայց շատ ավելի վատ վիճակով, որովհետև 1996թ–ին Ղարաբաղը գոնե կոնֆլիկտի կողմ էր, այսինքն՝ բանակցությունների լիարժեք մասնակից, նրա ձայնը վճռորոշ էր։ Ադրբեջանը և Հայաստանը կարող էին ինչ–որ բանում համաձայնել իրար հետ, բայց եթե Ղարաբաղը ասեր՝ ոչ, ապա ծրագիրը չէր գործում», – Ղարաբաղյան հարցի թեման շարունակեց ՀՀ առաջին նախագահը։

Ըստ նրա՝ դա է ապացուցում այն փաստը, որ 2007-ին Ադրբեջանի և Հայաստանի հավանությանն արժանացած՝ կոնֆլիկտի լուծման փաթեթային և փուլային լուծումներին Ղարաբաղը դեմ քվեարկեց։

Իսկ Ռոբերտ Քոչարյանին, ըստ Տեր–Պետրոսյանի, որի գիծը շարունակում է Ս. Սարգսյանը, համոզեցին, որ Ղարաբաղը «դուրս շպրտվի» գործընթացից, և դրանով է, որ «նրանք կկործանեն Ղարաբաղը»։ «Հիմա Սերժ Սարգսյանը սկսել է խոսել Ղարաբաղը բանակցային գործընթացի մեջ որպես կողմ կրկին ներգրավելու մասին։ Ի՞նչ ներգրավելու մասին է խոսքը։ Ղարաբաղը ունի մանդատ, այդ մանդատը նրան տվել է Բուդապեշտի գագաթնաժողովը, որ նա հակամարտության լիարժեք կողմ է», – ասաց Տեր Պետորսյանը՝ նշելով, որ պետք է պայքարեն այդ մանդատը հետ վերցնելու համար։

Իր ելույթում նախագահը նշեց, որ իշխանությունները «համաձայնում են արևմուտքի ճնշմանը, որպեսզի հեշտուհանգիստ գողանան, գռփեն, հղփանան և Մոնտե–Կառլոյի և Բադեն–Բադենի կազինոներում տանուլ տան ժողովրդի փողերը»։

«Ինչպե՞ս կարող է մարդ վստահել մեկին, ով վաղը մտնելու է իր տուն և իրեն թալանելու է։ Ինչքա՞ն ընտրակաշառք են բաժանում, 5 հազար դրա՞մ։ Իսկ դուք գիտե՞ք չորս տարվա ընթացքում ձեզանից քանի հազար դրամ են գողանում», – հավաքվածներին հարց ուղղեց Տեր–Պետրոսյանը՝ ինքն էլ դրան պատասխանելով. «10 հազար դոլլար ամեն մարդուց՝ 5 տարվա ընթացքում»։

ՀԱԿ առաջնորդը հիշեց 1998–ը, երբ «ամբողջ օրը հանրահավաքներ էին անում». «Այս իշխանությունները վերջին չորս տարում 120 անգամ արգելել են մեզ հանրահավաք անցկացնել։ Ասա, ինչի՞ց եք վախենում։ Դուք հիշեք այն ժամանակ համալսարանն առյուծ էր կտրել, ակադեմիան, մեր մասին ինչ ասես գրում էին։ Մենք գալիս ենք հենց այդ վիճակը վերականգնելու, որպեսզի դուք մեզանից չվախենաք», – ասաց նա։

Իսկ իր ելույթը նախագահը եզրափակեց կոչով. «Ուզում ե՞ք այս վիճակից դուրս գալ, ուսերը թափ տալ, ուղիղ կանգնել, և իշխանության առջև անընդհատ պահանջներ դնել, իշխանությունը գող կլինի, թալանչի կլինի, եթե նրանից պահանջող չլինի, ընտրե՛ք մեզ։ Սխալ կանենք, տվե՛ք մեր վզին, մեզ էլ դուրս շպրտեք։ Մենք գալիս ենք ձեր ընտրելու իրավունքը ձեզ վերադարձնելու համար։ Ուրիշ ոչինչ»։