Մահացել է Ռուսաստանի ժողովրդական արտիստ, կոմպոզիտոր Գեորգի Մովսեսյանը

Ռուսաստանի կոմպոզիտորների միության ներկայացուցիչ Վլադիսլավ Կազենինը «ИТАР-ТАСС»–ին հայտնել է, որ Մոսկվայում 67 տարեկանում հանկարծամահ է եղել Ռուսաստանի ժողովրդական արտիստ, կոմպոզիտոր Գեորգի Մովսեսյանը։ 

Կազենինի խոսքերով՝ Գնեսնիների անվան ինստիտուտի շրջանավարտ Գեորգի Մովսեսյանը ողջ կյանքում կապված է եղել երգին, որը նա սիրել է և որը գլխավորն է եղել նրա բազմակողմանի ստեղծագործական գործունեության մեջ։ Միլիոնավոր մարդիկ են հիշում նրա «Мои года, мое богатство», «Проводы любви» երգերը, որոնք հանդիսատեսին են հասել Վախթանգ Կիկաբիձեի կատարմամբ։ Իսկ հայտնի երգչուհի Աննա Գերմանի այցեքարտն էր Մովսեսյանի «Береза» երգը։ Գեորգի Մովսեսյանը համագործակցել է այնպիսի հայտնի ռուս բանաստեղծների հետ, ինչպիսիք են Ռոբերտ Ռոժդեստվենսկին և Միխայիլ Տանիչը։

Ինչպես նշել է Կազենինը՝ ինքը, որպես Ռուսաստանի կոմպոզիտորների միության ներկայացուցիչ, հատկապես հիշում է համատեղ շրջագայություններն երկրի ողջ տարածքում։ Նա ավելացրել է, որ Գեորգի Մովսեսյանի անունն ու ստեղծագործություններն երկար կհիշվեն միլիոնավոր ռուս երաժշտասերների կողմից։