«Երկիր». Ես էլ եմ Լևոն Տեր-Պետրոսյանի հետ ուզում բանավիճել. Սամվել Ալեքսանյան

Աժ պատգամավոր և Երևանի թիվ 7 ընտրատարածքում մեծամասնական ընտրակարգով առաջադրված պատգամավորի թեկնածու Սամվել Ալեքսանյանի հետ թերթի զրույցը ներկայացնում ենք ստորև.

–Պարոն Ալեքսանյան, Նիկոլ Փաշինյանը միանշանակ պնդում է, որ ապրիլի 15-ին Մալաթիա–Սեբաստիայում կանանց «սադրիչ խումբը» ուղարկված է եղել Ձեր կողմից։

–Ես ոչ մի բանից տեղյակ չեմ։ Նիկոլ Փաշինյանը նամակներ ա բաժանել, դրա համար էլ իմ ընտրողները կարդացել են ու զայրացել են։

–Ինչի՞ց են զայրացել։

–Դե՝ ինչ–որ ածական անուն ա գրել։ 

–Այսինքն՝ Ձեզ այդքան սիրո՞ւմ են ձեր համայնքում։

–Դե որ սիրող չլինեին, չէին հելնի Նիկոլի դեմը ասեին՝ խի եք էս ձևի բան արել։ Համ էլ եթե Նիկոլը գալիս ա, թող մենակ գա, ոչ թե ոստիկանների հետ թաղերը շրջի։ Եթե ժողովուրդը սիրում ա իրան, խի ա ոստիկանների հետ ման գալիս…

–ՀԱԿ անդամ Զոյա Թադևոսյանն էլ մեզ հետ  զրույցում նշել է, որ ձեր վարորդը՝ Էդոն, այդ կանանց մեջ էր, ինչը ևս մեկ անգամ գալիս է ապացուցելու, որ հենց Դուք էիք այդ կանանց ուղարկել։

–Ես Էդիկ անունով վարորդ չունեմ։ 

- Պարոն Ալեքսանյան, ինչո՞ւ չհամաձայնեցիք Նիկոլ Փաշինյանի առաջարկին և չբանավիճեցիք նրա հետ:

-Ես չեմ ուզում, որ Ռուբեն Հայրապետյանը ինձ չհարգի: Համ էլ դա նույն ա, որ «Փյունիկը» «Բարսելոնային» Երևանում խաղի հրավիրի:

-Նույն Ռուբեն Հայրապետյանը երեկ ևս չբանավիճեց Նիկոլ Փաշինյանի հետ: Նա հայտարարել է, որ պատրաստ է բանավիճել միայն Տեր-Պետրոսյանի կամ ՀԱԿ համամասնական ցուցակի առաջին տասնյակի անձանց հետ, բացի Արամ Սարգսյանից, ում հետ ընկերներ են: Դուք ո՞ւմ հետ եք ցանկանում ՀԱԿ-ից բանավիճել:

-Ես էլ եմ Լևոն Տեր-Պետրոսյանի հետ ուզում բանավիճել, որովհետև 1995-ից իրան լիքը բան ունեմ ասելու:

-Մասնավորապե՞ս:

-Մասնավորապես 95թ. ընտրությունների հետ կապված, որովհետև ես էլ էի դրել թեկնածություն, ու ինձ պրոբլեմներ ստեղծեցին:

-Ի՞նչ խնդիրներ:

-Այ որ գա, էն ժամանակ էլ կասեմ:

-Շարունակո՞ւմ եք Ձեզ մրցակից համարել Վարդան Վարդանյանի՞ն:

-Այո:

-Չե՞ք կարծում, որ Փաշինյանն ավելի ուժեղ մրցակից է:

-Չէ, որվհետև Նիկոլը առաջին անգամ ա գալիս մեր համայնք, 3-րդ մասում ա ապրում, մեր համայնքի համար ոչ մի բան չի արել, իսկ Վարդան Վարդանյանը ապրում ա էս համայնքում, այ դրա համար ա, որ ես իրան եմ համարում մրցակից:

-Ձեր 3-րդ մրցակիցը ոմն Տիգրան Գրիգորյանն է, ճանաչո՞ւմ եք նրան:

-Չէ, ուղղակի գիտեմ, որ առաջադրված թեկնածու ա:

-Շարունակո՞ւմ եք վստահ լինել, որ հաղթելու եք:

-Բա ոնց, ես Նիկոլին խոսք էի տվել, չէ՞ որ իմ հաղթանակի քեֆին՝ «Փարվանայում», թամադա եմ դնելու, բայց քանի որ իրան ճիշտ չպահեց, ժողովրդի վրա ոստիկաններով եկավ, մեր ժողովուրդը էլ համաձայն չի, որ թամադան ինքը լինի:

-Փաստորեն, քեֆն առանց թամադա է մնում:

-Չէ, ո՞վ ասեց, իրանցից մեկին կդնեմ, բայց ոչ Նիկոլին:

–Նախընտրական ծախսերը հոգալու համար հաշվեհամար էիք բացել, որքա՞ն գումար է հավաքվել։

 –Ահագին հավաքվել ա, հերիք ա։

–Որքա՞ն։

–Չեմ կարա ասեմ, թե ինչքան, բայց բավարար ա։