Օբաման Կոնգրեսին է ներկայացրել վառելիքի շուկայում մանիպուլյացիաների դեմ պայքարի նախագիծ

ԱՄՆ նախագահ Բարաք Օբաման Կոնգրեսին կոչ է արել ձեռնարկել վառելիքի շուկայում կատարվող մանիպուլյացիաների դեմ պայքարի մի շարք միջոցառումներ, գրում է The Washington Post–ը։

Օբաման այդ խնդրի կարգավորման նախագիծը Կոնգրեսին ներկայացրել է ապրիլ 17–ին, որում մասնավորապես ներառված է աշխատակազմի ընդլայնումը, ինչը կնպաստի վառելիքի շուկայում ֆյուչերսային պայմանագրերով գործարքներն արդյունավետորեն վերահսկելուն, բացի այդ Օբաման առաջարկել է 1-10 միլիոն դոլարով բարձրացնել վառելիքի շուկայում մանիպուլյացիաներ կատարող ընկերությունների տուգանիք չափը։

Միևնույն ժամանակ, Օբաման խոստովանել է, որ «այդ միջոցառումները ձեռնարկելուց հետո ոչ ոք չի կարող ասել, որ հաջորդ օրն անմիջապես կնվազեն նավթի և բենզինի գները» և նշել է, որ այդ քայլերը կարող են մեղմացնել վառելիքի շուկայում տիրող անհարկի շահարկումները, «ինչն էլ, իր հերթին, կլինի այն բանի վառ ապացույց, որ կառավարությունը հոգ է տանում ամերիկացի սպառողների շահերի համար»։

Օբամայի քաղաքական ընդդիմախոսները բազմիցս քննադատության են ենթարկվել Սպիտակ տան վարչակազմին՝ վառելիքի շուկայում առկա բարձր գների համար (մեկ գալոն բենզինի միջին արժեքը 3.9 դոլար)։ Մասնավորապես, այդ հարցը բարձրացրել է ԱՄՆ նախագահի հանրապետական միասնական թեկնածուի հավակնորդ Միտ Ռոմնին։

Կոնգրեսին ներկայացրած Օբամայի նախագիծն արդեն բացասական գնահատականի է արժանացել Կոնգրեսում ներկայացված հանրապետականների կողմից։ Սենատի հանրապետական փոքրամասնության ղեկավար Միթչ Մաքքոնելը հայտարարել է, որ Օբամայի այդ նախագիծը նախագահական ընտրությունների շեմին միայն նրա ժողովրդականությունը բարձրացնելու նպատակ է հետապնդում։

«Բենզինի գինը նա չի՛ նվազի», – նշել է Մաքքոնելը։

ԱՄՆ Ներկայացուցիչների պալատի խոսնակ, հանրապետական Ջոն Բեյները Օբամայի նախագիծը «քաղաքական խաբեություն» է անվանել։  Ըստ Բեյների, վառելիքի շուկայում ընկերությունների կողմից կատարվող շահարկումների դեմ համարժեք պայքարելու բոլոր քաղաքական լծակները և անհրաժեշտ ռեսուրսներն Օբաման արդեն ունի։

«Ուրեմն, ինչու՞ է դիմում քաղաքական խաբեության։ Նա ուղղակի կարող է հանձնարարել, որ իր վարչակազմն այդ հարցը լուծի»,- ասել է նա։