Հարգում եմ Զոլյանի մասնագիտական կարողություններն ու վաստակը. Արմեն Աշոտյան

Երեկ Facebook սոցցանցի իր էջում Կրթության և գիտության նախարար Արմեն Աշոտյանն անդրադարձել է նախօրեին Վ. Բրյուսովի անվան լեզվաբանական համալսարանի ռեկտորին պաշտոնից ազատելու հրամանին։

«Մի կողմ թողնելով հարցի հուզական կողմը, ուզում եմ հայտնել հետևյալը'

1. Աբսուրդային են այն լուրերը, թե Բրյուսովի անվան լեզվաբանական համալսրանը լուծարվելու է:
2. Համալսրանի և ոչ մի ուսանող այս ընթացքում չի տուժել և չի տուժելու, դասերը, ստուգարքները, քննությունները շարունակվելու են սովորական ռեժիմով:
3. Այս տարվա շրջանավարտները կստանան իրենց հասանելիք դիպլոմները:
4. Դիպլոմում սխալ մասնագիտական գրառմամբ ոչ մի նախկին շրջանավարտ անհանգստանալու կարիք չունի: Մեր մեղքն է, որ այդ խախտումը ուշ է հայտնաբերվել, և ոչ թե ձեր»,– գրել է Արմեն Աշոտյանը:

Աշոտյանը նաև գրել է, որ  Զոլյանն աշխատանքից ազատվել է ՀՀ գործող օրենսդրության շրջանակներում՝ հավելելով, որ հարցի իրավական մանրամասնությունները պատրաստ են ներկայացնել դատարանում:

«Հարցը չունի քաղաքական ենթատեքստ: Սակայն որոշ քաղաքական շրջանակներ և քաղաքականացված և ուղղորդված ԶԼՄ-ներ փորձում են շահարկել այն:

Հ.Գ. Հարգում եմ Ս. Զոլյանի մասնագիտական կարողություններն ու վաստակը, ցավում եմ իր անվայելուչ ու հայ մտավորականին ոչ հարիր պահվածքի համար:

Ինձ համար չկան արտոնյալ պայմաններում աշխատող մարդիկ: Կան պետություն, օրենքներ, ՀՀ քաղաքացիներ»,– գրել է  Արմեն Աշոտյանը: