Թուրքական ոստիկանությունը որևէ քայլ չի ձեռնարկել Սասունի հայկական վանքի ու գերեզմանատան հրկիզման դեպքի առնչությամբ

Անհայտ անձիք հրկիզել են Թուրքիայի Բաթման նահանգի Սասուն գավառի հայկական Սուրբ Պետրոս վանքն ու հարակից հայկական գերեզմանատունը: Ինչպես փոխանցում է «Արմենպրես»-ը' վկայակոչելով «Ասպարեզ» պարբերականը, Սասունի, Բիթլիսի, Բաթմանի, Մուշի, Վանի և Ստամբուլի հայերի ընկերային օգնության մշակութային միությունն այս մասին զեկուցել է Սասունի տարածքային դատախազություն:

Թուրքիական Demokrathaber կայքը տեղեկացնում է, որ միության նախագահ Ազիզ Տաղճը հաղորդել է հրդեհի հետևանքով հայ հոգևորականների ոսկորների այրման մասին, որոնք գանձ որոնողները դուրս են հանել գերեզմանափոսերից:

Թուրքական ոստիկանության ստորաբաժանումներն այդպես էլ չեն այցելել դեպքի վայր' մանրամասները պարզելու և հետաքննություն սկսելու համար: «Նույն օրը տեղեկացրինք Բաթմանի ժանդարմերիայի հրամանատարությանը: Ասացին, որ հրշեջներ պետք է ուղարկեն: Սակայն հրշեջ մեքենան չի կարող բարձրանալ Մեշելի գյուղ, քանի որ եկեղեցի տանող ճանապարհը դեռ բաց չէ: Հրդեհը մարելու համար օգնության համար պետք է շնորհակալություն հայտնել Մեշելի բնակիչներին», - նշել է Տաղճը:

1500-ամյա հայկական Ս. Պետրոս վանական համալիրը մինչ այդ էլ անխնա շահագործվել է տեղի գյուղացիների կողմից' նրանց անասունների համար ծառայելով որպես ախոռ: