Թուրքական սոցցանցերում շրջանառվում է Դավութօղլուին Յալչըն Աքդողանով փոխարինելու տարբերակը

Թուրքիայում համացանցի ֆենոմեն համարվող Fuat Avni օգտատերը հանդես եկել թուրքական օրակարգը ցնցող պնդումով:

Ինչպես հաղորդում է «Արմենպրես»-ը' վկայակոչելով «Ջումհուրիեթ» թերթը, Twitter-ի իր էջում Fuat Avni անվան տակ հանդես եկած անձը հայտարարել է, որ առաջիկա արտահերթ խորհրդարանական ընտրություններում իշխող «Արդարություն եւ զարգացում կուսակցության (ԱԶԿ) Թուրքիայի վարչապետի թեկնածուն կլինի Յալչըն Աքդողանը (ԱԶԿ-ի ակտիվ գործիչ):

Fuat Avni-ին եւս մեկ ուշագրավ «գուշակություն» է արել: Նշելով, որ թուրքական պետության ներսում «շատ գաղտնի ծրագրեր են կազմվում», համացանցային գուշակը հայտարարել է, որ «այդ պլաններն ուղղված են երկրում «ներքին պատերազմի» բորբոքմանը, իսկ թուրքական անվտանգության ուժերի դեմ հարձակումները շարունակվելու են»:

Նշենք, որ Fuat Avni-ին դեռեւս հունիսին հայտարարել է, որ Դավութօղլուն թողնելու է պաշտոնը: Այդ պնդման համաձայն' հունիսի 7-ի խորհրդարանական ընտրություններում կրած պարտությունից անմիջապես հետո Թուրքիայի նախագահ Ռեջեփ Թայիփ Էրդողանն իր մոտ շրջապատի հետ գաղտնի ժողով է անցկացրել, եւ հայտնել, որ Դավութղօլուի հետ համատեղ աշխատանքը շարունակել այլեւս հնարավոր չէ: