Ընտրությունների արդյունքները ցույց կտան՝ արդյո՞ք մենք արժանի ենք պահպանելու իշխանությունը. Սերժ Սարգսյան

Հայաստանի Հանրապետական կուսակցության ղեկավար Սերժ Սարգսյանը նախընտրական քարոզարշավի շրջանակներում այսօր հանդիպեց Վայոց Ձորի մարզի Մալիշկա գյուղի բնակիչների հետ, որից հետո Սարգսյանն այցելեց նաև Արենի:

«Մենք կարող ենք պատասխանել մեր բոլոր չարակամների մեղադրանքներին ու հարցերին: Մի շարք քաղաքական ուժեր, հանդես գալով ժողովրդի անունից, քննադատել են ՀՀԿ-ին: Շատերն իրենց ծրագրերը ներկայացնում են՝ միաժամանակ մեզ հեղինակազրկելով: Բայց մենք չենք վախենում և պատրաստ ենք ընդունել կառուցողական քննադատությունը՝ ունենալով դա ի գիտություն»,- ասաց Սերժ Սարգսյանը:

Սարգսյանը նշեց նաև, որ ինքը միշտ մեծ պատասխանատվություն է զգում ՀՀԿ-ի անունից կատարած աշխատանքների, դրա արդյունքների և հետևանքների համար։ ՀՀԿ առաջնորդի խոսքերով՝ շատերը թուլության նշան են ներկայացնում այն, որ ինքն է հանդես գալիս ՀՀԿ-ի անունից Հայաստանի մարզերում՝ նշելով, որ ոչ ոք չի կարող պատասխանել ու խոսել կուսակցության ապագա քաղաքականությունից այնքան պատասխանատվությամբ, որքան ինքը:

Ըստ ՀՀԿ ղեկավարի՝ յուրաքանչյուր քաղաքացու մասնակցությունն ազատ և արդար ընտրությունների համար կարևոր դերակատարում է:

«Դուք պետք է լուրջ մոտենաք ընտրություններին: Ընտրությունների արդյունքները ցույց կտան՝ արդյո՞ք մենք արժանի ենք պահպանելու իշխանությունը, թե՞ պետք է այն զիջենք մեկ այլ ուժի»,- ասաց Սարգսյանը: