Առավոտյան ոստիկաններն իմ տուն են այցելել. Տիգրան Խզմալյան

«Առաջին անգամը չէ, տեսախցիկները վաղուց կան: Իսկ հոգեբանական ճնշման մասին խոսելն ավելորդ է, եթե նրանք ֆիզիկական ճնշում էլ են գործադրում: Այսինքն ինչո՞ւ չտեսնել ֆիզիկականը և ուշադրություն դարձնել հոգեբանականին»,- Լուրեր.com-ի հետ զրույցում ասաց կինոռեժիսոր Տիգրան Խզմալյանը` մեկնաբանելով այսօր մամուլում տարածված լուրերը:

«Եթե նրանց պետք է ինչ-որ բան նկարահանել, նրանք նկարահանում են: Կարծեմ պատմության մեջ, եթե ոչ առաջին, ապա առաջին անգամներից մեկն է, որ հայկական ոստիկանությունը, իր պաշտոնական գրառումներում հիմնվում է YouTube-ի նյութերի վրա, համենայնդեպս երկու օր առաջ հաղորդագրությունը տոգորված էր YouTube-ից մեջբերումներով: Դա ուրախալի էր, և հիացած եմ, որ մեր ոստիկանությունը օգտագործում է նաև առաջադեմ տեխնոլոգիաները, չնայած լավ կլիներ եթե դա ժողովրդի դեմ չօգտագործվեր»,-ասաց Խզմալյանը:

Հիշեցնենք, որ մամուլում հրապարակված լուրերի համաձայն Մաշտոցի պուրակում տեսախցիկ են տեղադրել և երբ երիտասարդ ակտիվիստները բարձրաստիճան ոստիկաններին հարցրել են, թե այդ «կամերան» ինչի՞ համար է, պատասխանել են, որ քաղաքապետարանն է տեղադրել, այնտեղից էլ պարզաբանում թող պահանջեն:

Ըստ մամուլի, տեսախցիկները նախ հոգեբանական ճնշման, վախեցնելու միջոց է, և հետո ինչպես ասում են՝ «մատերիալ» են հավաքում՝ հետագայում ակտիվիստների և հատկապես ապամոնտաժելու փորձ անողների վրա գործ հարուցելու համար:

Անդրադառնալով ոստիկանների «մատերիալ» հավաքելուն՝ հետագայում ակտիվիստների և հատկապես ապամոնտաժելու փորձ անողների վրա գործ հարուցելուն Խզմալյանն ասաց.

«Բնականաբար: Ես կզարմանայի, եթե նրանք խաղարկային ֆիլմ նկարեին և դրա համար նյութեր հավաքեին: Պարզ է, որ ոստիկանությունը տեսախցիկները օգտագործելու է զուտ ոստիկանական աշխատանքների համար: Ընդհանրապես ես մեկ ու կես տարի առաջ հույս եմ հայտնել, որ հայկական կինոյի ապագան ոստիկանության ամուր ձեռքերում է, քանի որ «Հայֆիլմ» և «Երևան» կինոստուդիաները կազմաքանդելուց հետո տեսախցիկները տեղափոխվել են, և կինո նկարահանվում է հիմնականում ոստիկանական մեքենաների միջոցով: Կարծեմ բոլոր մեքենաներում տեղադրված են տեսախցիկներ և կարծում եմ, որ տաղանդավոր ռեժիսոր լինելու դեպքում բավական հետաքրքիր ֆիլմեր կարելի է նկարել, ավելի հետաքրքիր և տաղանդավոր, քան այն՝ ինչ ցուցադրվում է հեռուսատեսությամբ»:

Անդրադառնալով լրատվամիջոցներում տարածված մեկ այլ լուրի, ըստ որի ոստիկանները գնացել են Մաշտոցի պուրակի անօրինական կրպակներն ապամոնտաժող քաղաքացիական առաջին բրիգադի անդամ Մանվել Սարգսյանի տուն, և քանի որ նա տանը չի եղել, այցելել են նրա աշխատավայր, Խզմալյանն ասաց.

«Ես տանը չեմ, ոստիկանները առավոտյան իմ տուն էլ են այցելել: Երեք ոստիկաններ՝ մեկի ձեռքին ֆոտո կամ կինո տեսախցիկ է եղել, հարևաններս զանգահարեցին ինձ ասացին: Ես ափսոսում եմ, որ ներկա չեմ եղել, և ստիպված անհանգստացրել եմ հարևաններիս»:

Հարցին. «Իսկ թե ինչո՞ւ էին այցելել» Խզմալյան ասաց.

«Չգիտեմ, ստորագրություն են վերցրել հարևաններից, որ իրենք այցելել են, և ինձ չեն գտել, բայց ես չեմ թաքնվում, եթե կարիք լինի ինձ հեշտ է գտնել, կարծում եմ իրենք դա կանեն առաջիկա ժամերին»: