«Երկիր».Աճող գործազրկություն

«Ըստ Պետեկամուտների կոմիտեի՝ այս տարվա 9 ամսվա կտրվածքով, 420 ընկերություններ հայտարարագրել են 100 և ավելի աշխատողներ։ Աշխատակիցների թվով ցուցակի առաջին տեղում զբաղեցնող «Հայաստանի էլեկտրական ցանցեր» ընկերությունը մեկ տարվա ընթացքում աշխատողների քանակը կրճատել է 235–ով՝ 7622–ի փոխարեն այս տարի հայտարարագրելով 7385։ Հեռահաղորդակցության ոլորտի խոշոր օպերատոր «Արմենիա Տելեֆոն Քոմփանի» ընկերությունն իր հերթին պակաս է հայտարարագրել 139 աշխատող։ Կրճատումների այս շքերթը, արդեն երկնիշ թվերով, շարունակում են «Երևան ջուր»–ը՝ 71 հոգի, «Հայջրմուղը»՝ 57 հոգի, «Նաիրիտը» ՝ 64 հոգի, «Երևանի Կ. Դեմիրճյանի անվան մետրոպոլիտենը»՝ 72 հոգի և տասնյակ այլ ընկերություններ։

Զուգահեռաբար կան նաև ընկերություններ, որտեղ աշխատակիցներ են ավելացել։ Պարզապես ընկերություններում աշխատողների և ավելացումների ու կրճատումների իսկությունը միշտ էլ կասկածի տակ է առնվում այն պարզ պատճառով, որ մի կողմից գործատուները փորձում են ամեն գնով պակաս աշխատակիցներ հայտարարագրել, մյուս կողմից՝ պետությունը փորձում է թաքցնել գործազրկության իրական աճը։ Եթե հավատալու լինենք ԱՎԾ տվյալներին, ապա գործազրկությունը մեզ մոտ 7–7,2 տոկոսից չի անցնում։ Եթե հավատալու լինենք հարկային մարմիններին, ապա նրանք ամեն ինչ անում են թաքնված աշխատողներին բացահայտելու և հարկային դաշտ բերելու ուղղությամբ։ Այնպես որ, պարզ չէ՝ հիմա սրանք իրական կրճատումներ են, որոնց ընկերությունները գնացել են անհրաժեշտաբար, թե՞ վերջիններս փորձել են այսպիսով խուսափել հարկային պատասխանատվությունից։ Երկու դեպքում էլ՝ իշխանությունները մտածելու շատ բան ունեն։

Հաճախ են երկրիս առաջին դեմքերը հպարտորեն ինչ–որ կարմիր «լենտչկաներ» կտրում՝ ի ցույց աշխատատեղերի ավելացման։ Սակայն ճգնաժամային այս տարիներին, ինչպես փաստում է վիճակագրությունը, կրճատվում է ավելի շատ աշխատատեղեր, քան ստեղծվում»,– գրում է «Երկիր»-ը։