Պատրաստ եմ ընդունել դատարանի ցանկացած որոշում. Արմեն Աշոտյան

Արմեն Աշոտյանը քիչ առաջ ուսանողների «վախկոտ», «դասադուլ» վանկարկումների ներքո իջավ Բրյուսովի անվան պետական լեզվաբանական համալսարանի բակ: Այժմ ուսանողներն իրենց հարցերն են ուղղում նախարարին՝ պահանջելով հիմնավորել, թե որոնք են այն իրավական հիմքերը, որոնց պատճառով բուհի ռեկտոր Սուրեն Զոլյանն ազատվել է պաշտոնից: Նախարարի պատասխանից հետո ուսանողներից ոմանք սկսեցին վանկարկել՝ «Հեքիա՛թ, հեքիա՛թ»: Նշենք, որ հանդիպմանը ներկա է ռեկտորի ժամանակավոր պաշտոնակատար Գաբրիել Բալայանը. Զոլյանը բացակայում է:

Լրագրողների հետ զրույցում Աշոտյանն ասաց, թե ուսանողների հետ հանդիպելու իր ցանկությունը ձեռք չէր տալիս բոլոր այն մարդկանց, որոնց չի հետաքրքում իրականությունը, որոնք փորձում են օգտագործել ստեղծված իրավիճակը քաղաքական շահարկումների համար: 

«Պատրաստ եմ հանդիպել, բացատրել համապատասխան գործողությունների հաջորդականությունը, իրավականությունը: Ցավում եմ, որ մի խումբ ուսանողներ փորձում են ներկայանալ որպես Բրյուսովի ամբողջ ուսանողության ցանկություններն արտահայտող: Մեր որոշումը կարող է վերանայվել դատարանում: Եղել են օրենքը խախտողներ, կայացվել են համապատասան որոշումներ, ազատվել է ռեկտորը: Բոլոր տեսակի նման ձևով հարցերը լուծելու ձևերը շանտաժ են: Եթե իրականում այդքան վստահ են իրավական փաստարկների մեջ, թող դիմեն դատարան»,- ասաց Աշոտյանը:

Հիշեցնենք, որ ՀՀ կրթության և գիտության նախարար Արմեն Աշոտյանի՝ երկու օր առաջ ստորագրած հրամանով Վ. Բրյուսովի անվան լեզվաբանական համալսարանի ռեկտոր Սուրեն Զոլյանը հեռացվել է զբաղեցրած պաշտոնից, որն էլ ուսանողների դժգոհության պատճառ է դարձել: Երեկ ուսանողները ցույց էին կազմակերպել Կրթության և գիտության նախարարության և Կառավարության շենքերի դիմաց: Նախարարն ուսանողներից մի քանիսի հետ հանդիպմանը երեկ խոստացել էր գալ համալսարան և պատասխանել ուսանողներին հետաքրքող հարցերին: 

Ի դեպ, համալսարանում լուրեր են շրջանառվում, որ ուսանողական խորհուրդը լուծարվելու է, քանի որ այն չի աջակցել ուսանողների երեկ իրականացրած ակցիային:

Քիչ առաջ Լուրեր.com–ի լրագրողը հայտնեց, որ Բրյուսովի անվան լեզվաբանական համալսարանի ուսանողներից մեկը՝ Նարեկ Սամսոնյանը, ձերբակալվել է և տեղափոխվել ոստիկանության Կենտրոնականի բաժին։