Առանց Սուրիկ Խաչատրյանի նա ոչինչ է. Հմայակ Հովհաննիսյանը` Սենիկ Ջուլհակյանի մասին

Հայաստանի քաղաքագետների միության նախագահ Հմայակ Հովհաննիսյանն այսօր լրագրողների հետ հանդիպման ժամանակ խոսելով այն մասին, որ իրենից ուզում են խլել իր գրասենյակը, ասաց հետևյալը. «Ներկայացնելու եմ պատմություն, որը խտացված ներկայացնում է մեր երկրում այսօր եղած բոլոր հիմնական պրոբլեմները և ցավերը, անհարդուրժողականության այն մթնոլորտը, որը սերմանվում է այսօր իշխող ուժի կողմից` չնայած հրապարակումների, որ իրենք պատրաստ են լինել հանդուրժող: Ես մեր աշխատակիցներին խստիվ արգելել էի խոսել այն ճնշումների մասին, որ կատարվում էր կազմակերպության նկատմամբ, որը սկսվել էր հունվարից: Մեր միջոցով ստեղծվեց ընտրությունների հանրային վերահսկողության միասնական շտաբ և այսօր այդ շտաբը գործում է, և ոչինչ չի կարող խաթարել այդ շտաբի գործը»:

Հովհաննիսյանը նշեց, որ ՀՔՄ շենքի երկու հարկերը զբաղեցնող Հայհիդրոնախագիծ ինստիտուտը ղեկավարող Սենիկ Ջուլհակյանը միջնորդի միջոցով դիմել է իրեն` հանդիպելու առաջարկով, որի ժամանակ առաջարկել է վաճառել տարածքը` հայտնելով, որ Արտաշես Գեղամյանի գրասենյակի հարցը լուծված է: Ըստ Հովհաննիսյանի` Ջուլհակյանը ցանկանում է գնել նաև մյուս չորս սեփականատերերին պատկանող տարածքները, սակայն նա կտրականապես մերժել է: «Նա այդ խոսակցությունը գաղտնի ձայնագրել էր, ինչի իրավունքը չուներ, դրանից հետո այստեղ սկսվեց ջրհեղեղի նման մի բան, ջուրը թափվում էր և դա անում էին միտումնավոր: Դրանից հետո ես մարտի 27-ին ստանում եմ մի գրութուն, որտեղ առաջարկվում է 3-օրյա ժամկետում վերադարձնել տարածքը, քանի որ ընկերությունը կատարում է վերանորոգում, գրությանը կցվել է կառավարության որոշումն այն մասին, որ Հայհիդրոնախագծին օտարվել է 1900 քմ տարածք», - նշեց Հմայակ Հովհաննիսյանը՝ կարծիք հայտնելով, որ Սենիկ Ջուլհակյանի հետևում կանգնած է Լիսկան` «առանց Սուրիկ Խաչատրյանի նա ոչինչ է»:

Հմայակ Հովհաննիսյանն ասաց նաև, որ ինքը դատական կարգով չի բողոքելու: «Ես պատրաստվում եմ շարունակել իմ գործունեությունը, ինչ արել եմ մինչ այժմ: Հենց որևէ ոտնձգություն լինի, ես պատասխանելու եմ նրանց և չեմ նահանջելու ոչ մի ճնշումների առաջ»,- նշեց ՀՔՄ նախագահը: