Զզվելի է, որ օլիգարխները կրկին վերադառնում են խորհրդարան. Ռիչարդ Կիրակոսյան

Նախընտրական շրջանում հայոց ցեղասպանության հարցը չի քննարկվում: Այսօր լրագրողների հետ հանդիպման ժամանակ նման կարծիք հայտնեց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը: Լուրեր.com-ի հարցին, թե ինչու չի քննարկվում, Կիրակոսյանը պատասխանեց, թե Հայաստանում քաղաքականությունն անձերի վրա է հիմնված:

«Խնդիրն այն է, որ քաղաքական քննարկումների ու բանավեճերի մակարդակը շատ ցածր է: Հայաստանում քաղաքականութունը շարունակում է մնալ անձերի քաղաքականություն, ոչ թե քաղաքական քննարկումների: Ազգային կարևորություն ունեցող խնդիրները այդքան շատ չեն քննարկվում քաղաքական շրջանակներում: Հանրությունը պահանջում է քննարկումներ կարևոր հարցերի շուրջ: Դրա փոխարեն տեսնում ենք քաղաքականություն, որտեղ առաջնային դեր են կատարում նախկին կամ ներկայիս նախագահները»,- նշեց Կիրակոսյանը:

Կիրակոսյանը նշեց, որ ամենակարևորն այն է, որ ցեղասպանությունը ճանաչի Թուրքիան և նրա համար կարևոր չէ՝ ԱՄՆ նախագահ Բարաք Օբաման կարտաբերի՞ «ցեղասպանություն» բառը, թե` ոչ: «Կարիք չունեմ, որ ԱՄՆ նախագահն ասի այն, ինչ ես արդեն գիտեմ»,- ասում է քաղաքագետը: 

Խոսելով ապագա խորհրդարանի մասին` բանախոսն ասաց. «Օլիգարխները վերածվում են պետության և իշխանության համար թիվ մեկ սպառնալիքի: Խնդիրը լուծելու համար հարկավոր է քաղաքական կամք: Զզվելի է, որ օլիգարխները կրկին վերադառնում են խորհրդարան»: