Գագիկ Ծառուկյանը զենք կրելու իրավունք չունի՞. Հմայակ Հովհաննիսյան

Հայաստանի քաղաքագետների միության նախագահ Հմայակ Հովհաննիսյանն այսօր լրագրողների հետ հանդիպման ժամանակ անդրադարձ կատարեց նախընտրական հանդիպումներից մեկի ժամանակ ԲՀԿ առաջնորդ Գագիկ Ծառուկյանի գոտկատեղին ամրացված առարկայի` զենք կամ հեռախոս լինելու փաստին` նշելով, որ Անդրանիկ Մարգարյանն էլ միշտ իր մոտ զենք էր կրում:

«Ինչ վերաբերում է նախընտրական և ընտրական շրջանին, իհարկե այն երկրում, որտեղ կան Լիսկաներ, «մասկեքի» անվան տակ գործող քրեական խմբավորումների ղեկավարներ այն պարագայում, երբ նրանք փորձում են զավթել Երևանի կենտրոնը, այո՛, այդպիսի պայմաններում իհարկե մարդը պետք է օգտվի իր սահմանադրական իրավունքից և օրինական զենք կրի և պաշտպանվի ահա այդպիսի վտանգներից: Հնարավոր է Գագիկ Ծառուկյանի մոտ մի տեղում հեռախոսն է եղել, մյուս տեղում` ատրճանակը: Հիմա Գագիկ Ծառուկյանն ի՞նչ իմանա, որ կողմից են նկարել: Ինքը զենք կրելու իրավունք չունի՞: Նորից եմ ասում, որ շատ հնարավոր է, որ դա եղել է հեռախոս, այլ ոչ թե` զենք»,- ասաց բանախոսը:

Հովհաննիսյանի խոսքերով` նա չի դիտել այդ տեսանյութը, որովհետև դրան նշանակություն չի տալիս` նշելով, որ, այնուամենայնիվ, մեր երկիրը այդքան ապահով չի, որ մարդիկ, ովքեր օրինական իրավունք ունեն զենք կրելու, այդ զենքը մշտապես չկրեն:

«Մեր երկիրը դեռևս չի դառել այն ապահով երկիրը, որտեղ քաղաքական գործիչն այնքան ապահովվագրված է տարբեր կարգի թափթփուկների ոտնձգություններից, որ չօգտվի զենք կրելու օրինական իրավունքից: Ինչ վերաբերում է այդ հարցի շուրջ եղած աղմուկին, կարծում եմ, որ դա այն հարցը չի, որն այդքան մեծ ուշադրության է արժանի: Չնայած, իհարկե, սա ևս մեկ անգամ պետք է առիթ լինի մտածելու, որ մեր երկիրն ապահով երկիր չէ, և հենց դրա գիտակցումը պատճառներից մեկն է, որ արտագաղթը շարունակվում է», - նշեց Հմայակ Հովհաննիսյանը: