Ջիզրեում դիպուկահարի կրակոցից վիրավորվել է 12-ամյա աղջիկ

Թուրքիա 11 Սեպտեմբեր, 2015 13:54

Թուրքիայի Հաքքարի նահանգի Ջիզրե գավառում, որտեղ գործում է փողոց դուրս գալու արգելքը, շարունակում են մահանալ և վիրավորվել քաղաքացիներ: Ինչպես հաղորդում է «Արմենպրես»-ը' վկայակոչելով թուրքական Demokrathaber.net-ը, մեկ շաբաթ շարունակվող արգելքի դեմ իրենց բողոքն արտահայտելու նպատակով Ջիզրեի թաղամասերից մեկում հավաք է իրականացվել:

Հավաքի մասնակիցներից մեկը' 12-ամյա մի աղջիկ, շրջակայքի բարձրահարկ շինություններից մեկում թաքնված դիպուկահարի կրակոցի հետևանքով գլխի հատվածում վնասվածք է ստացել: Հաղորդվում է, որ աղջկա վիճակը ծանր է:

Ջիզրեում սեպտեմբերի 4-ին ընդունված փողոց դուրս գալու արգելքը շարունակվում է: Ջիզրեի տարբեր հատվածներում շարունակում են լսվել կրակոցների ձայներ: Դադարեցվել է հեռախոսային ցանցի և համացանցի հասանելիությունը: Նշվում է, որ գավառում չկա անգամ էլեկտրականություն: Հացի փռերի մոտ գոյանում են մեծ հերթեր: Հերթական վիրավորների թվում են երեխաներ: Հաց գնելու նպատակով փողոց դուրս եկած 5 տարեկան 3 երեխա ոտքի շրջանում հրազենային վիրավորում է ստացել: Փողոց դուրս գալու արգելքի պատճառով Ջիզրե չեն գնում շտապօգնության հաշվարկները, ինչի պատճառով սեպտեմբերի 8-ի գիշերը այնտեղ մահացել է 80-ամյա բնակիչներից մեկը: Կան չհաստատված տեղեկություններ այն մասին, որ սեպտեմբերի 9-ի գիշերը Ջիզրեում սպանվել է 8 քաղաքացի:

Թուրքիայի քրդական Ժողովուրդների դեմոկրատական կուսակցությունը սեպտեմբերի 9-ից ճանապարհ է դուրս եկել Ջիզրե հասնելու համար, սակայն ոստիկանությունը Ջիզրեից 1 կմ հեռավորության վրա վերջնականապես թույլ չի տալիս նրանց մտնել գավառ: Քրդական կուսակցության պատվիրակության կազմում է նաև Ստամբուլից ընտրված հայ պատգամավոր Գարո Պայլանը: Պատվիրակությունը ղեկավարում է կուսակցության առաջնորդ Սելահաթթին Դեմիրթաշը: