Կոնգրեսի հանրահավաքը փորձել են խոչընդոտել. Արամ Մանուկյան

ՀՀՇ վարչության նախագահ, ՀԱԿ անդամ Արամ Մանուկյանը հանրահավաքի մեկնարկին հայտարարեց, որ հանրահավաքը ուշացավ այն պատճառով, որ ինչ-որ կազմակերպություն փորձում էր խոչընդոտել հանրահավաքը:

«Հոսանք չտվեցին մեզ: Պարտավոր են նախընտրական քարոզչության փուլը կազմակերպեն հավուր պատշաճի: Կտեսնեք, որ մյուս կուսակցություններին չեն խանգարի, հոսանք էլ կունենան: Հիմա «դվիժոկով» ենք հոսանք միացրել»,- նշեց Մանուկյանը:

Նա հայտարարեց, որ մարզային հանդիպումների ընթացքում ՀԱԿ-ը բազմաթիվ խոչընդոտների է հանդիպել, վախեցնելու փորձեր են եղել, որ մադրիկ չմասնակցեն հանդիպումներին:

«Տեղեր կային, որ հանդիպումները շատ լավ են անցել, հաշվի չառնելով խոչընդոտները՝ մարդիկ եկել, մասնակցել են: Էջմիածնում գեներալները, որ ազգի հպարտությունն ու պարծանք են, ամեն կերպ արգելել էին մարդկանց մուտքը հրապարակ: Թվում է, թե ունենք ոստիկանություն, որը պետք է պայքարի հանցագործությունների դեմ, այնինչ իշխանության բոլոր մարդկային և վարչական բոլոր ռեսուրսներն ուղղված են ՀԱԿ-ի հանդիպումները խոչընդոտելու դեմ»,- ասաց Մանուկյանը:

Մանուկյանի համոզմամբ՝ իշխանությունների կատարած ապիկարություններն ու բռնությունները ժողովրդի զայրույթն են առաջացնում:

«Օրինական ճանապարհներով կստիպենք, որ մայիսի 6-ին լինեն նորմալ ընտրություններ: Ուզում եմ, որ յուրաքանչյուրդ աջակցեք ՀԱԿ-ի մեծամասնական ընտրակարգով առաջադրված թեկնածուներին և ՀԱԿ-ին»,- կոչ արեց Մանուկյանը: