Հայերը ձեզնով հպարտանում են, բոլորդ հայ եք. թուրք ոստիկանները Ջիզրեում հակահայկական արտահայտություններ են հնչեցնում (տեսանյութ)

Արդեն մեկ շաբաթ թուրքական ոստիկանության կողմից շրջափակման մեջ գտնվող թուրքական Ջիզրեում սեփական ժողովրդի նկատմամբ թուրքական իրավապահ մարմինների ատելությունը կրկին դրսևորվել է հակահայկական արտահայտություններով: Ինչպես հաղորդում է «Արմենպրես»-ը, թուրքական հայտնի «Թարաֆ» պարբերականը հրապարակել է մի տեսանյութ, որում հնչեցվող կրակոցներից հետո ոստիկաններից մեկը հեգնանքով սկսում է բղավել. «Հայերը ձեզնով հպարտանում են: Բոլորդ հայ եք»:

Ի պատասխան նման հայտարարությունների' Ջիզրեի բնակիչներից մեկը լացակումած սկսել է բղավել. «Պարոն նախագահ, Ձեզ եմ ձայն տալիս: Արդեն բավական է, պարոն նախագահ, բավական է... Աստծու սիրուն, բավական է»:

Ջիզրեում սեպտեմբերի 4-ին ընդունված փողոց դուրս գալու արգելքը շարունակվում է: Ջիզրեի տարբեր հատվածներում շարունակում են լսվել կրակոցների ձայներ: Դադարեցվել է հեռախոսային ցանցի և համացանցի հասանելիությունը: Նշվում է, որ գավառում չկա անգամ էլեկտրականություն: Հացի փռերի մոտ գոյանում են մեծ հերթեր: Հերթական վիրավորների թվում են երեխաներ: Հաց գնելու նպատակով փողոց դուրս եկած 5 տարեկան 3 երեխա ոտքի շրջանում հրազենային վիրավորում է ստացել: Փողոց դուրս գալու արգելքի պատճառով Ջիզրե չեն գնում շտապօգնության հաշվարկները: Մեկ շաբաթվա ընթացքում Ջիզրեում զոհվել է 14 քաղաքացի, շատերը վիրավորվել են:

Թուրքիայի քրդական Ժողովուրդների դեմոկրատական կուսակցության պատվիրակությունը սեպտեմբերի 9-ից ճանապարհ է դուրս եկել Ջիզրե հասնելու համար, սակայն ոստիկանությունը Ջիզրեից 1 կմ հեռավորության վրա վերջնականապես թույլ չի տալիս նրանց մտնել գավառ: Քրդական կուսակցության պատվիրակության կազմում է նաև Ստամբուլից ընտրված հայ պատգամավոր Գարո Պայլանը: Պատվիրակությունը ղեկավարում է կուսակցության առաջնորդ Սելահաթթին Դեմիրթաշը: