Նարեկ Մարտիրոսյանը հանդես կգա երևանյան բեմում

«Israel Ballet» թատրոնի մենակատար Նարեկ Մարտիրոսյանը' ս. թ. ապրիլի 23-ին Ալ. Սպենդիարյանի անվան օպերայի և բալետի ազգային ակադեմիական թատրոնում կայանալիք Արամ Խաչատրյանի «Սպարտակ» բալետի ներկայացման մեջ հանդես կգա Կրասոսի դերում: Այդ մասին ասված է Մշակույթի նախարարության պաշտոնական կայքում զետեղված հաղորդագրությունում։ 

Նարեկ Մարտիրոսյանը ծնվել է 1988 թ. Երևանում, սովորել' Երևանի պարարվեստի ուսումնարանի դասական պարի բաժնում, այնուհետև, որպես մենապարող աշխատել է Ալ. Սպենդիարյանի անվան օպերայի և բալետի ազգային ակադեմիական թատրոնում: 2011 թ.-ից «Israel Ballet»-ի առաջատար մենապարողներից է. հանդես է եկել Էսկամիլիոյի «Կարմեն-Սյուիտ» /Բիզե-Շչեդրին/, Գիքոյի «Գայանե» /Ա.Խաչատրյան/, «Տանգո» /Ա.Պիացցոլլա/, Առաքելի «Վարդանանք» /Է. Հովհաննիսյան/, Էսպադայի «Դոն Կիխոտ» /Լ. Մինկուս/, Յագոյի «Մավրի պավանա» /Հ.Պյորսել/, Կրասոսի «Սպարտակ» /Ա. Խաչատրյան/, Թիբալտի «Ռոմեո և Ջուլիետ» /Ս. Պրոկոֆև/ դերերով: