Կարևորում ենք գիտության ֆինանսավորման էական ավելացումը. Արմեն Մարտիրոսյան

Ինչպես հիշում ենք, «Պահանջում ենք գիտության ֆինանսավորման ավելացում» Facebook-յան նախաձեռնությունը կոչ էր արել քաղաքական ուժերին իրենց նախընտրական ծրագրերում ամրագրել գիտության ֆինանսավորման ավելացման հարցը:

Կոչն ուղղված էր համամասնական ընտրակարգով պայքարող կուսակցություններին, բայց քանի որ գալիք ԱԺ-ում պատգամավորների շուրջ մեկ երրորդը ընտրվելու են մեծամասնական ընտրակարգով, որոշեցի հարցազրույց վերցնել մեծամասնական ընտրակարգով առաջադրված թեկնածուներից մեկից. մասնավորապես, քանի որ գիտնական-ընտրողների քանակով առաջին տեղում 6-րդ ընտրատարածքն է (Երևանի Ֆիզիկայի Ինստիտուտի ավանի' «գառադոկ»-ի հաշվին), որոշեցի հարցազրույց վերցնել այդտեղ առաջադրված «Ժառանգության» ներկայացուցիչ Արմեն Մարտիրոսյանից, որը 4-րդ գումարման ԱԺ-ում բազմիցս է խոսել գիտության խնդիրներից:

-Պարո՛ն Մարտիրոսյան, որպես մեծամասնական ընտրակարգով առաջադրված թեկնածու, ինչպիսի՞ն են ձեր նախընտրական ծրագրային դրույթները գիտությանը վերաբերվող հարցերում:

-Նախ, ես բացի մեծամասնական ընտրակարգով թեկնածու լինելուց, նաև «Ժառանգության» համամասնական ցուցակով թեկնածու եմ, այդ կուսակցության անդամ եմ և մեծամասնական ընտրակարգով առաջադրվել եմ մեր կուսակցությունից, ինչը ենթադրում է, որ անկախ այն համգամանքից, թե ինչպիսի ընտրակարգով ես կընտրվեմ ԱԺ պատգամավոր, ես իրականացնելու եմ այն դրույթները, որոնք ամրագրված են «Ժառանգություն» կուսակցության նախընտրական ծրագրում, որն արդեն հրապարակվել է:
Գիտության վերաբերյալ, մասնավորապես, շատ կարևորում ենք ֆինանսավորման էական ավելացումը, քանի որ հակառակ դեպքում մենք կարող ենք աղետ արձանագրել այդ ոլորտում: Մենք գիտակցում ենք գիտության առանձնակի դերը Հայաստանի ապագայում, և հետևաբար, մենք չենք կարող զարկ չտալ գիտության զարգացմանը:

-Բարի, իսկ ինչպե՞ս եք դուք տեսնում այդ զարկը: Ինչպիսի՞ն են լինելու Ձեր քայլերը ընտրվելու դեպքում:

-Առաջին քայլերն լինելու են 2013 թվականի բյուջեյում գիտությանը հատկացնել ՀՆԱ-ի առնվազն 1 տոկոսը, որը, հաշվի առնելով տնտեսական աճը, կկազմի շուրջ 50 միլիարդ դրամ: Գիտության ֆինանսավորումը հիմնականում կհատկացվի թեմատիկ ձևով, որի օբյեկտիվության համար մենք կընդունենք «Գիտատեխնիկական փորձաքննության մասին» օրենքը, որը ներկայիս իշխանությունները, ի հեճուկս խոստումների, արդեն տարիներ շարունակ չեն ընդունում:

Իսկ հետագայում, սկսած 2014 թվականից, գիտության ֆինանսավորումը յուրաքանչուր տարի կաճի ՀՆԱ-ի 0.2 տոկոսի չափով, մինչև չհասնի ՀՆԱ-ի 3 տոկոսի: Դա է գիտության ֆինանսավորման այն չափը, որը ընդունված է զարգացած գիտություն ունեցող' այսինքն, ընդհանրապես, զարգացած երկրներում, ինչպիսին, համոզված եմ, կլինի նաև Հայաստանը ապագայում:

-Պարոն Մարտիրոսյան, 6-րդ ընտրատարածքի տարածքում է նաև հայտնի «ֆիզիկայի գառադոկը», որտեղ հազարից ավել գիտնականներ, գիտություն հետ կապ ունեցող այլ ընտրողներ և իրենց ընտանիքների անդամներ են բնակվում: Ինպե՞ս եք կարծում, այդ համգամանքը ավելացնում է ընտրվելու Ձեր հնարավորությունները:

-Իհարկե այո: Մեր ակտիվիստներն արդեն այցելել են ֆիզիկայի գիտավան, և տպավորություններն այնպիսին են, որ ֆիզիկոսները քաջատեղյակ են թե՛ իմ և թե՛ «Ժառանգության» ծավալած գործունեությունից ու ծրագրերից: Գիտնականները տեղյակ են, որ ես այս ընտրատարածքում առաջադրվածներից միակն եմ, ով գիտությունների թակնածու է, տեղյակ են, որ շուրջ 20 տարի զբաղվել եմ գիտական և մանկավարժական գործունեությամբ և որ իմ գործնկերների հետ ակտիվորեն ներկայացրել եմ իրենց շահերը 4-րդ գումարման Ազգային Ժողովում: Համոզված եմ, որ գիտնականները սատարում են ինձ ու «Ժառանգությանը»:

Դանիել Իոաննիսյան